اسلام آباد: وزیراعظم شہباز شریف نے انگریزی چینل پاکستان ٹی وی ڈیجیٹل کا افتتاح کرتے ہوئے کہا ہے کہ ڈیجیٹل چینل کے آغاز کا بنیادی مقصد مسلسل حقیقی خبریں فراہم کر کے پاکستان بارے ہونیوالی غلط بیانی و پروپیگنڈے کا مو ثر جواب دینا ہے۔
جاری بیان کے مطابق بدھ کو وزیراعظم شہباز شریف نے پاکستان ٹیلی ویژن میں قائم پاکستان ٹی وی ڈیجیٹل کا دورہ کیا، اس موقع پر وزیر اطلاعات عطا اللہ تارڑ، سیکرٹری اطلاعات عنبرین جان اور دیگر اعلی حکام موجود تھے۔
وزیراعظم نے پاکستان ٹی وی ڈیجیٹل کے قیام کی تختی کی نقاب کشائی کی اور ڈیجیٹل چینل کی باقاعدہ نشریات کے آغاز کا افتتاح کیا۔وزیر اطلاعات نے وزیر اعظم کو پاکستان ٹی وی ڈیجیٹل کے اغراض و مقاصد سے آگاہ کرتے ہوئے بتایا کہ پاکستان ٹی وی ڈیجیٹل عالمی سامعین کو پاکستان کیلئے فعال ومستند آواز فراہم کرنے، معلومات کافرق کو ختم کرنے اور عوامی سفارت کاری کیلئے انگریزی زبان کے ایک پلیٹ فارم کے طور پر کام کرے گا۔
وزیر اعظم نے نئے چینل کے مختلف سیکشن کا دورہ کیا اور کام کرنے والے نوجوانوں سے بات چیت کی۔ وزیراعظم نے نوجوانوں کے جذبے کی تعریف کرتے ہوئے کہا کہ بیرونی بیانیہ کی جنگ میں جوانوں کا کردار انتہائی اہم ہے، اس ڈیجیٹل چینل کے آغاز کا بنیادی مقصد مسلسل حقیقی خبریں فراہم کرتے ہوئے پاکستان کے بارے میں ہونیوالی غلط بیانی اور پروپیگنڈے کا مو ثر جواب دینا ہے۔وزیر اعظم نے پاکستان ٹی وی ڈیجیٹل کی نشریات کیلئے اپنا پہلا انٹرویو بھی ریکارڈ کروایا۔
