ادلب: شام کے عبوری صدر احمد الشرع نے کہا ہے کہ اسرائیل السویدا میں براہِ راست مداخلت کے ذریعے شام کو کمزور کرنے کی کوشش کر رہا ہے،شام کو متحد کرنے کی لڑائی ضروری ہے لیکن یہ لڑائی جنگ کے ذریعے نہیں ہونی چاہیے۔
ان خیالات کا اظہار انہوں نے ادلب میں ایک اجلاس کے دوران کیا۔ احمد الشرع نے ملک کی سرحدوں کی سالمیت پر زور دیتے ہوئے کہا ہے کہ کچھ عناصر اسرائیل کی پشت پناہی حاصل کر کے اپنی خواہشات کے حصول کی ناکام کوشش کررہے ہیں۔
انہوں نے خبردار کیا کہ کچھ بیرونی قوتیں شام کو کمزور دیکھنا چاہتی ہیں اور اس کی اندرونی یکجہتی کو نقصان پہنچانے کی کوشش کر رہی ہیں۔ صدر نے یہ بھی کہا کہ کچھ کے ارادے ملک کو تقسیم کرنے کے ہیں، لیکن یہ ناممکن ہے۔
الشرع نے واضح کیا کہ ریاست السویدا میں اپنی حدود سے تجاوز کے مرتکب افراد کے خلاف قانونی کارروائی ضروری ہے۔ الشرع نے بتایا کہ کچھ زمینی اقدامات جو شامی ڈیموکریٹک فورسز کر رہی ہیں، مذاکرات میں زیر بحث باتوں سے مختلف ہیں۔
انہوں نے کہاکہ ہمارے اور قسد کے درمیان تاریخی ہم آہنگی موجود ہے اور ہم نفاذ کے طریقہ کار پر بات کر رہے ہیں، چند ماہ باقی ہیں جب یہ معاہدہ زمینی سطح پر نافذ ہوگا ۔
