اسلام آباد: وزیراعظم شہباز شریف کے کوآرڈنیٹر برائے صحت ڈاکٹر ملک مختار نے کہا ہے کہ منکی پاکس کے 90 سے 95 فیصد مریض صحتیاب ہو جاتے ہیں کسی میں علامات ظاہر ہوں تو اسے آئیسولیٹ ہونا چاہئے۔ تفصیلات کے مطابق اسلام آباد میں میڈیا سے گفتگو کرتے ہوئے ڈاکٹر ملک مختار نے بتایا کہ وزیراعظم شہباز شریف کی زیر صدارت منکی پاکس بارے اہم اجلاس منعقد ہوا جس میں جس میں ٹیسٹنگ لیبارٹریز، کٹ اور ادویات سے متعلق بریفنگ دی گئی ہے۔
انہوں نے بتایا کہ وزیر اعظم کو ایئر پورٹس اور بارڈر پر انتظامات سے متعلق آگاہ کیا گیا ہے۔انہوں نے بتایا کہ منکی پاکس کی جنوبی افریقہ میں انسانوں میں تشخیص 1970ء ہوئی تھی اور آج تک دنیا میں 99 ہزار لوگوں میں منکی پاکس پازیٹو آیا ہے۔
انہوں نے بتایا کہ پاکستان میں منکی پاکس کا پہلا کیس 11 اپریل 2023ء میں سامنے آیا تھا۔ انہوں نے کہا کہ منکی پاکس کی علامات 4 سے 15 روز میں ظاہر ہوتی ہیں، اگر کسی میں علامات ظاہر ہوں تو اسے آئیسولیٹ ہونا چاہئے۔انہوں نے بتایا کہ منکی پاکس کے 90 سے 95 فیصد مریض صحتیاب ہو جاتے ہیں۔
