کراچی: وزیراعلی سندھ مراد علی شاہ نے بچوں کو پولیو ویکسین پلانے سے انکار کرنیوالے والدین کیخلاف کارروائی کی ہدایت کرتے ہوئے کہا ہے کہ دنیا بھر میں پولیو ختم ہوچکا مگر ہم چند لوگوں کے عدم تعاون کی وجہ سے مرض سے نجات نہیں پا رہے، وائرس کے خاتمے تک چین سے نہیں بیٹھیں گے۔
تفصیلات کے مطابق کراچی میں میڈیا سے گفتگو کرتے ہوئے وزیر اعلیٰ سندھ نے محکمہ ہیلتھ کو انسداد پولیو مہم مزید مؤثر بنانے کی ہدایت کرتے ہوئے کہا کہ پولیو کا موذی مرض بچے کی پوری زندگی تباہ کر دیتا ہے،دنیا بھر میں پولیو کا خاتمہ ہو چکا ہے مگر ہم چند لوگوں کے عدم تعاون اور رویئے کی وجہ سے پولیو سے نجات نہیں پا رہے۔
انہوں نے کہا کہ انسداد پولیو کے قطرے پلانے سے انکار کی کوئی گنجائش نہیں ہے، بچوں کے والدین اور سرپرست تعاون کریں۔ انہوں نے کہا کہ انکاری والدین اور سرپرستوں کیخلاف کارروائی کی جائے گی۔ انہوں نے کہا کہ مہم کے دوران کراچی کی 85 یونین کونسلز میں بچوں کو پولیو قطرے پلائے جائیں گے۔
انہوں نے کہا کہ شہر کے بیشتر علاقے پولیو وائرس میں ہائی رسک پر ہیں۔ انہوں نے حکام کو ہدایت کی کہ مہم کے دوران11 لاکھ بچوں میں سے کوئی بچہ ویکسین سے محروم نہیں رہنا چاہئے۔ انہوں نے کہا کہ انسداد پولیو مہم میں انتظامیہ اور پولیس ہیلتھ ورکرز کی بھرپور مدد کریں۔
انہوں نے کہا کہ پولیو وائرس کے خاتمے تک حکومت چین سے نہیں بیٹھے گی۔انہوں نے کہا کہ مہم کی کامیابی والدین کے تعاون پر منحصر ہے، بچوں کو صحتمند معاشرے اور خوشحال مستقبل کی فراہمی سب کا فرض ہے۔
