ایران نے واضح کیا ہے کہ انسانی حقوق کے نام پر تشدد، دہشت گردی کی حوصلہ افزائی ناقابل قبول ہے، بیرونی سرپرستی میں دہشت گردی کیخلاف قومی سلامتی کا دفاع کیا جائے گا، جی سیون ایران کے داخلی معاملات میں غیرقانونی مداخلت بند کرے۔
غیر ملکی میڈیا کے مطابق ایرانی وزارت خارجہ کی جانب سے جاری بیان میں کہا گیا ہے کہ حالیہ پرتشدد واقعات اور دہشت گردی میں اسرائیلی کردار کے ناقابل تردید شواہد موجود ہیں، ایرانی قوم 2025ء میں اسرائیلی حملوں میں شہری ہلاکتوں کو فراموش نہیں کرے گی۔
انہوں نے کہا کہ فلسطینی عوام کی نسل کشی میں جی سیون ممالک اسرائیل کیساتھ براہ راست شریک ہیں۔
انہوں نے مطالبہ کیا کہ جی سیون ایران کے داخلی معاملات میں غیرقانونی مداخلت بند، غیرقانونی پابندیاں ختم اور انسانی حقوق کو سیاسی ہتھیار نہ بنایا جائے۔
بیان میں کہا گیا ہے کہ انسانی حقوق کے نام پر تشدد اور دہشت گردی کی حوصلہ افزائی ناقابل قبول ہے، 8سے 10جنوری کے دوران مظاہرین اور سیکیورٹی اہلکاروں پر حملے کیے گئے، امریکی اور اسرائیلی حکام کے بیانات تشدد پر اکسانے کا واضح ثبوت ہیں۔
ایرانی وزارت خارجہ نے کہا ہے کہ ایران پرامن احتجاج کے حق کا احترام کرتا ہے، ریاست شہریوں کے تحفظ اور امن وامان برقرار رکھنے کی مکمل ذمے داری نبھائے گی تاہم بیرونی سرپرستی میں دہشت گردی کے خلاف قومی سلامتی کا دفاع کیا جائے گا۔
