ڈی جی ایف آئی اے رفعت مختار نے اسلام آباد انٹرنیشنل ایئر پورٹ پر کیو مینجمنٹ سسٹم کی تنصیب، عملے میں اضافے اور پری ڈیپارچر ایپ کے اجراء کا اعلان کردیا۔
ترجمان کی جانب سے جاری بیان کے مطابق سوشل میڈیا پر ایف آئی اے امیگریشن کی کارکردگی سے متعلق غلط فہمیوں کے حوالے سے ڈی جی ایف آئی اے راجا رفعت مختار نے اسلام آباد انٹرنیشنل ایئرپورٹ کا دورہ کیا۔
ڈی جی ایف ائی اے کو بتایا گیا کہ اسلام آباد انٹرنیشنل ایئرپورٹ پر روزانہ 94بین الاقوامی پروازوں کی ہینڈلنگ کی جاتی ہے، یومیہ 10ہزار سے زائد بین الاقوامی مسافروں کی امیگریشن کلیئرنس ہوتی ہے تاہم مصروف اوقات میں پروازوں کی بیک وقت آمد سے عارضی ہجوم پیدا ہوتا ہے۔
ڈی جی کو بتایا گیا کہ 13جنوری کو ایف آئی اے امیگریشن نے ایک گھنٹے میں 2,400 مسافروں کی کلیئرنس مکمل کرنے کا ریکارڈ بنایا، اسلام آباد ایئرپورٹ پر ایف آئی اے امیگریشن 3 شفٹوں میں کام کر رہی ہے، روانگی کیلئے 15اور آمد کیلئے 13 امیگریشن کائونٹرز فعال ہیں، موسمی حالات اور تکنیکی خرابیوں کے باعث پروازوں میں تاخیر ہجوم کی وجہ بنتی ہے۔
ڈی جی کو بتایا گیا کہ ایف آئی اے اور پی اے اے کے درمیان قریبی رابطہ اور ہم آہنگی جاری ہے۔
اس موقع پر کیو مینجمنٹ سسٹم کی تنصیب کا فیصلہ جبکہ مرحلہ وار ای گیٹس کے نفاذ پر اتفاق کیا گیا۔
ترجمان کے مطابق ڈی جی نے ایف آئی اے عملے میں اضافے اور پری ڈیپارچر ایپ کے اجرا کا اعلان کیا اور مسافروں کی رہنمائی کیلئے کیو اسٹاف کی تعیناتی کا فیصلہ بھی کیا۔
