صدر آصف علی زرداری نے کہا ہے کہ پاکستان بحر ہند میں سمندری تعاون کے فروغ کیلئے پرعزم ہے،سمندر سے فائدہ اٹھانے کیلئے اجتماعی کوششوں کی ضرورت ہے، ماحولیاتی تبدیلی، آلودگی و ماحولیاتی نظام کی تنزلی جیسے مسائل کو حل کرنا ہوگا،مستقبل کی عالمی معاشی ترقی مشرقی ممالک پر منحصر کرے گی۔بلیو اکانومی تعاون پر تیسرے چین بحر ہند علاقائی فورم سے ویڈیو خطاب کرتے ہوئے صدر آصف علی زرداری نے کہا کہ سمندر سے بھرپور فائدہ اٹھانے کیلئے اجتماعی کوششوں کی ضرورت ہے، ماحولیاتی تبدیلی، آلودگی و ماحولیاتی نظام کی تنزلی جیسے مسائل کو حل کرنا ہوگا۔انہوں نے کہا کہ پاکستان بحری شعبے میں تعاون کے فروغ کیلئے تمام سٹیک ہولڈرز کیساتھ شراکت کا خواہاں ہے،
پاکستان چاہتا ہے ہمارا خطہ امن، ترقی اور پائیداری کا گڑھ بنا رہے۔صدر زرداری نے کہا کہ پاک چین اقتصادی راہداری کے تحت گوادر پورٹ کو ترقی دی جا رہی ہے ،گوادر پورٹ کو علاقائی روابط کے مرکز میں بدلا جارہا ہے، گوادر بندرگاہ سے تجارت اور سمندری اقتصادی ترقی کو فروغ حاصل ہوگا۔صدر نے بلیو اکانومی کی ترقی کیلئے پاکستانی کوششوں کو اجاگر کرتے ہوئے کہا کہ پاکستان نے نیشنل میری ٹائم پالیسی متعارف کرائی جبکہ پائیدار ماہی گیری اور سمندری تحفظ کیلئے اقدامات کئے گئے ہیں۔
انہوں نے کہا کہ لیونگ انڈس پروجیکٹ جیسے منصوبوں کا مقصد ماحولیاتی نظام کا تحفظ اور آلودگی کا مقابلہ کرنا ہے۔صدر مملکت نے فورم کے اہداف میں پائیدار ترقی پر توجہ دینے پر چین کی کوششوں کو سراہتے ہوئے کہا کہ فورم کے ایجنڈے میں استعدادِ کار میں اضافہ اور جزائر کی شمولیت خوش آئند ہے۔ انہوں نے کہا کہ سمندری وسائل کے تحفظ اور بلیو اکانومی کے فروغ کیلئے خطے میں اجتماعی کوششوں کی ضرورت ہے۔ انہوں نے کہا کہ دنیا کی بڑی آبادی چین اور ہمارے خطے کے دیگر ممالک میں رہتی ہے اس لئے مستقبل کی عالمی معاشی ترقی مشرقی ممالک پر منحصر کرے گی۔
