اسلام آباد ہائی کورٹ نے سابق نیوی افسران کے سزائے موت فیصلے پر عملدرآمد روکنے کا حکم امتناع ختم کردیا۔پیر کو اسلام آباد ہائیکورٹ میں جسٹس بابر ستار نے ڈاکیارڈ حملہ کیس میں سزائے موت پانے والے نیوی کے 5سابق افسران ارسلان نذیر ستی،محمد حماد،محمد طاہر رشید،حماد احمد اور عرفان اللہ کی دستاویزات کے حصول کی درخواست نمٹا دی۔ درخواست گزار کے وکیل کرنل ریٹائرڈ انعام الرحیم نے کہا کہ عدالتی حکم پرسرکاری وکیل کی موجودگی میں انکوائری رپورٹ اور فیصلے تک رسائی دیدی گئی تاہم انکوائری رپورٹ اور ججمنٹ کی کاپی فراہم نہیں کی گئی،
انکوائری رپورٹ اور ججمنٹ دکھائی گئی جس کے نوٹس بنالئے ہیں۔بعد ازاں عدالت نے سابق نیوی افسران کے سزائے موت فیصلے پر عملدرآمد روکنے کا حکم امتناع ختم کرتے ہوئے کیس نمٹا دیا۔ واضح رہے کہ نیوی حکام نے بورڈ آف انکوائری کی رپورٹ کو قومی سلامتی کا ایشو بتاتے ہوئے کاپی مجرمان کو فراہم کرنے سے انکار کیا تھا۔ عدالت نے سزائے موت پانے والے مجرمان کو ان سے متعلق ریکارڈ کی حد تک رسائی دینے کا حکم دیا تھا۔ نیوی کے پانچ اہلکاروں کو کورٹ مارشل کے ذریعے سزائے موت سنائی گئی تھی جس پر ہائی کورٹ نے عمل درآمد روک رکھا تھا۔
