وزیراعظم شہباز شریف نے کہا ہے کہ سانحہ اے پی ایس پر دل آج بھی غمزدہ ، خون کے آنسو روتا ہے، فتنہ الخوارج اور ان جیسے دوسرے دہشت گرد و ملک دشمن گروہوں کا دین سے تعلق ہے نہ ہی کسی بھی معاشرتی اقدار سے ، سکیورٹی فورسز ملک دشمن عناصر سے پوری ہمت اور جوانمردی سے نبرد آزما ہیں،قوم بزدل دہشت گردوں کیخلاف انشاء اللہ سیسہ پلائی دیوار کی طرح کھڑی رہے گی ۔سانحہ اے پی ایس کے 10سال مکمل ہونے پر اپنے پیغام میں وزیراعظم شہباز شریف نے کہا کہ آج ملکی تاریخ کے ناقابل فراموش سانحے ،بڑے نقصان کے 10سال مکمل ہو رہے ہیں ہمارا دل غم زدہ اور خون کے آنسو روتا ہے، یہ ایسا دل سوز واقعہ تھا جس کی یاد ایک دہائی سے ہمارے دلوں کو مضطرب کر رہی ہے۔ انہوں نے کہا کہ 16دسمبر 2014ء کو بزدل، بے رحم اور حیوانیت سے بھرپور دہشت گرد آرمی پبلک سکول پشاور کے احاطے میں گھس کر تباہی و بربادی کرتے ہوئے 144معصوم جانوں کو ہم سے ہمیشہ کیلئے جدا کر گئے، اس حیوانیت کا شکار ہوکر شہید ہونیوالوں میں سے اکثریت کم سن بچوں کی تھی جو بہت ہی کم عمری میں ہمیں غمگین کرکے دنیا سے چلے گئے، ان کی زندگی، خواب، امیدیں ،مستقبل چھین لیا گیا۔انہوں نے کہا کہ اس سانحے کو خواہ کتنا ہی وقت کیوں نہ گزر جائے ان معصوم و کم سن بچوں کی جدائی کے صدمے کو مٹا نہیں سکتا، انہوں نے کہا کہ والدین جنہوں نے اپنے پیاروں کو اس بھیانک سانحے میں کھویا کے غم اور تکلیف کو کسی طور بھی کم نہیں کیا جا سکتا ۔ انہوں نے کہا کہ قوم یاد رکھے کہ فتنہ الخوارج اور ان جیسے دوسرے دہشت گرد ملک دشمن گروہوں کا نہ دین سے کوئی تعلق ہے اور نہ ہی کسی بھی معاشرتی اقدار سے ، بیرونی ملک دشمن عناصر کی ایما پر یہ بزدل معصوم پاکستانیوں کو اپنے مذموم مقاصد کے حصول کیلئے نشانہ بناتے ہیں ، پوری قوم ان بزدل دہشت گردوں کے خلاف سیسہ پلائی ہوئی دیوار کی طرح کھڑی ہے اور انشا اللہ کھڑی رہے گی ۔ انہوں نے کہا کہ مجھ سمیت پوری قوم بچوں و اساتذہ کی بہادری کو سلام، انہیں خراج عقیدت، ان کے خاندانوں کی قربانیوں اور سکیورٹی فورسز کی بہادری کو خراج تحسین پیش کرتی ہے جو آج بھی تمام ملک دشمن عناصر سے پوری ہمت اور جوانمردی سے نبرد آزما ہیں۔ وزیراعظم نے کہا کہ آئیے آج ہم ایک پر امن اور محفوظ پاکستان کی تعمیر کیلئے اپنے عزم کا اعادہ کریں جہاں کسی معصوم کو دوبارہ اس ظلم و بربریت سے نقصان نہ پہنچے، کسی بھی بچے کو خوف کے عالم میں سکول نہ جانا پڑے اور ایسی کسی بھی ناانصافی کی کڑی سے کڑی سزا دی جائے۔
