آئی ایم ایف نے نجی شعبے کا حصہ بڑھا کر حکومتی حصہ محدود کرنے پر زوردیتے ہوئے کہا ہے کہ پاکستان کو موجودہ قرض پروگرام اہداف پر سختی سے عمل درآمد کی ضرورت ہے،حکومت ٹیکس نہ دینے والے شعبوں سے ٹیکس آمدن بڑھانے کیلئے پرعزم ہے۔پاکستان کیساتھ مذاکرات بارے جاری کئے گئے آئی ایم ایف اعلامئے میں کہا گیا ہے کہ 12تا 15نومبر تک پاکستان سے مشن چیف نیتھن پورٹر کی سربراہی میں مذاکرات ہوئے، مذاکرات میں وفاقی حکومت کیساتھ صوبائی حکومتوں سے بھی بات چیت ہوئی،
مذاکرات میں نجی شعبہ کے نمائندوں سے بھی تبادلہ خیال کیا گیا۔ اعلامئے کے مطابق پاکستانی حکام کیساتھ حالیہ بات چیت آئی ایم ایف کی ششماہی جائزہ کیلئے کی گئی تھی جو مثبت رہی ہے، مذاکرات میں معاشی اصلاحات، معاشی پالیسیز اور معاشی ترقی کیلئے حکومتی کارکردگی کا جائزہ لیا گیا ہے۔ آئی ایم ایف مشن چیف نیتھن پورٹر نے کہا ہے کہ پاکستان سے مذاکرات مجموعی طور پر مثبت رہے،
حکومت ایسے شعبہ سے ٹیکس آمدن بڑھانے کیلئے پر عزم ہے جو ٹیکس نہیں دے رہا، سماجی تحفظ اور ترقی میں صوبوں کے کردار کو بڑھانے پر بھی بات چیت ہوئی ہے۔نیتھن پورٹر نے بتایا کہ پاکستان میں توانائی اصلاحات و توانائی چیلنجز پر قابو پانے کیلئے خصوصی بات چیت کی گئی ہے۔ اعلامئے کے مطابق نیتھن پورٹر نے کہاہے کہ پاکستان کو موجودہ قرض پروگرام کے اہداف پر سختی سے عمل درآمد کی ضرورت ہے،
کئی شعبہ جات میں نجی شعبہ کا حصہ بڑھا کر حکومت پاکستان کا حصہ محدود کرنا ہوگا۔ مشن چیف آئی ایم ایف نے کہا ہے کہ موجودہ قرض پروگرام کے اہداف پر سختی سے عمل درآمد عوام کا معیار زندگی بہتر کرسکتا ہے، مذاکرات کیلئے پاکستانی حکام کا رویہ حوصلہ افزاء اور معاون تھا، پاکستان حکام سے مذاکرات پر آئی ایم ایف ایگزیکٹو بورڈ کو آگاہ کیا جائے گا، آئی ایم ایف کا وفد آئندہ سال 2025ء کی پہلی سہ ماہی میں پھر پاکستان آئے گا۔
