اسلام آباد: صدر آصف زرداری نے عیدمیلاد النبیؐ کے موقع پر قیدیوں کی سزاؤں میں 90 روز کمی کی منظوری دے دی۔تفصیلات کے مطابق صدر آصف زرداری نے عید میلاد النبیؐ کے موقع پر وزیراعظم کی ایڈوائس پر آئین کے آرٹیکل 45 کے تحت قیدیوں کی سزاؤں میں 90 دن کمی کی منظوری دے دی ہے۔
نوٹیفکیشن کے مطابق سزاؤں میں کمی کا اطلاق قتل، جاسوسی،ریاست مخالف سرگرمیوں میں ملوث قیدیوں، زنا، چوری، ڈکیتی، اغواء اور دہشت گردی میں سزا یافتہ مجرموں پر نہیں ہوگا، سزا میں کمی کا اطلاق غیر ملکی افراد ایکٹ، 1946 اور منشیات کنٹرول (ترمیمی) ایکٹ 2022 ء کے تحت سزا یافتہ افراد، مالی جرائم،قومی خزانے کو نقصان پہنچانے والے مجرموں پر بھی نہیں ہوگا۔اعلامئے کے مطابق قید میں کمی کا اطلاق 65 سال سے زائد عمر کے مرد قیدی جو اپنی ایک تہائی قید کاٹ چکے، 60 سال سے زائد عمر کی خواتین قیدی جو ایک تہائی قید کاٹ چکی ہیں اور 18 سال سے کم عمر افراد جو اپنی ایک تہائی سزا کاٹ چکے ہیں پرہوگا۔
