ڈھاکہ: ایشیائی ترقیاتی بینک نے بنگلہ دیش کی عبوری حکومت کی اہم ڈھانچہ جاتی اصلاحات کی کوششوں میں مدد دینے کا اعلان کیا ہے۔
جنوبی ایشیا کے لئے بینک کے ڈائریکٹر جنرل تاکیو کونی شی کی سربراہی میں ایشیائی ترقیاتی بینک کےایک اعلیٰ سطح کے وفد نے ڈھاکہ میں عبوری بنگلہ دیشی حکومت کے چیف ایڈوائزر محمد یونس سے ملاقات کی جس میں بینک نے بحران سے دوچار جنوبی ایشیائی معیشت کی مدد کرنے کی خواہش ظاہر کی ۔
ایشیائی ترقیاتی بینک کے سینئر عہدیدار نے کہا کہ بینک کی بنگلہ دیش میں کام کرنے کی ایک طویل تاریخ ہے اور وہ اہم ڈھانچہ جاتی اصلاحات شروع کرنے میں عبوری حکومت کی معاونت کرنے کا خواہشمند ہے۔
بنگلہ دیش کی عبوری حکومت کے سربراہ محمد یونس نے ایشیائی ترقیاتی بینک کے وفد کو بتایا کہ بنگلہ دیش نئے سرے سفر شروع کررہا ہے اور جتنی جلدی ہوسکے ہمیں ساراکام کرنا ہے۔
بنگلہ دیش میں اصلاحات کے ضمن میں عبوری سربراہ محمد یونس نے اعلان کیا تھا کہ حکومت نے عدلیہ، انتخابی نظام، انتظامیہ، پولیس، اینٹی کرپشن کمیشن اور آئین میں اصلاحات کے لیے چھ کمیشن بنانے کا فیصلہ کیا ہے۔
