لاہور: ملک بھر میں جاری مون سون بارشوں اور گلیشیرز پگھلنے کے نتیجے میں پنجاب کے دریائوں میں پانی کے بہائو میں اضافہ ہو گیا، تربیلا 98 فیصد، منگلا 68 فیصد بھر گیا جبکہ کئی دریائوں میں مختلف مقامات پر نچلے درجے کا سیلاب ریکارڈ کیا گیا ہے۔
ترجمان پی ڈی ایم اے کے مطابق دریائے سندھ میں کالا باغ اور چشمہ بیراج ،تربیلا اور تونسہ بیراج پر نچلے درجے کا سیلاب ہے، دریائے ستلج میں گنڈا سنگھ والا کے مقام پر پانی کا بہا 68 ہزار کیوسک تک پہنچ گیا ہے،اسی طرح دریائے جہلم اور دریائے چناب کے اہم مقامات پر پانی کی صورتحال فی الحال معمول کے مطابق ہے، تاہم نالہ پلکھو کینٹ میں نچلے درجے کا سیلاب جاری ہے، دریائے راوی کے مختلف مقامات پر بہائو معمول کے مطابق ہے لیکن نالہ بسنتر میں پانی کی سطح بلند ہو رہی ہے جس سے نچلے درجے کا سیلاب برقرار ہے۔
ترجمان کے مطابق تربیلا ڈیم 98 فیصد جبکہ منگلا ڈیم 68فیصد بھر چکا ہے، تربیلا ڈیم کا لیول 1547.94فٹ جبکہ منگلا ڈیم کا لیول 1211.15فٹ ریکارڈ کیا گیا ہے۔
ڈی جی پی ڈی ایم اے عرفان علی کاٹھیا نے شہریوں کو خبردار کرتے ہوئے کہا ہے کہ موجودہ حالات میں احتیاطی تدابیر اختیار کریں، دریائوں کے پاٹ میں موجود افراد فوری محفوظ مقامات پر منتقل ہوں اور ہنگامی انخلا کی صورت میں انتظامیہ سے مکمل تعاون کریں۔
شہریوں کو ہدایت کی گئی ہے کہ دریائوں، نہروں، ندی نالوں اور تالابوں میں ہرگز نہ نہائیں اور سیلابی صورتحال میں دریاں کے کناروں پر سیر و تفریح سے گریز کریں۔ حکام نے کہا ہے کہ ایمرجنسی کی کسی بھی صورتحال میں شہری پی ڈی ایم اے پنجاب کی ہیلپ لائن 1129پر رابطہ کریں۔
