راولپنڈی: پاک بحریہ کے جہاز پی این ایس حنین نے ترکیہ کی بندرگاہوں گلوچک اور اکساز کا دورہ کیا اورترک کوسٹ گارڈ کے جہاز گیلیبولو کے ہمراہ دسویں 2 طرفہ بحری مشق کی۔آئی ایس پی آر سے جاری بیان کے مطابق پاک بحریہ کے جہاز پی این ایس حنین نے ترکیہ کی بندرگاہوں گلوچک اور اکساز کا دورہ کیا،ترک بندرگاہ پہنچنے پر پاکستانی سفارتخانے کے عملے اور ترک بحریہ کے اعلیٰ حکام نے جہاز اور عملے کا استقبال کیا۔
گلوچک میں کمانڈنگ افسر کی ترک بحریہ کے فلیٹ کمانڈر اور گلوچک نیول بیس کے کمانڈر سے ملاقاتیں ہوئیں جبکہ اکساز میں ترک بحریہ کے کمانڈر سیکنڈ ڈسٹرائر اسکواڈرن نے جہاز کا دورہ کیا۔دورے میں ترک بحریہ کے جہاز ٹی سی جی گیلیبولو کے کمانڈنگ افسر بھی ہمراہ تھے۔
آئی ایس پی آر کے مطابق اس موقع پر پی این ایس حنین اور ترک کوسٹ گارڈ کے جہاز گیلیبولو کے درمیان دسویں 2 طرفہ بحری مشق کی گئی۔بیان کے مطابق بحری مشق کا مقصددونوں ممالک کی بحری افواج کے درمیان باہمی تعاون اورمشترکہ آپریشنز کی صلاحیت بڑھانا تھا۔
