اسلام آباد: رواں مالی سال کے پہلے ماہ غذائی اشیاء کی برآمدات میں 45 فیصد اضافہ ہوگیا، جولائی میں 47 کروڑ 57 لاکھ ڈالر سے زائد مالیت کی خوراک ایکسپورٹ کی گئی۔ تفصیلات کے مطابق ادارہ شماریات کی جانب سے جاری رپورٹ میں بتایا گیا ہے کہ رواں مالی سال کے پہلے ماہ پاکستان کی غذائی اشیاء کی برآمدات میں 45 فیصد اضافہ سامنے آیا ہے، جولائی 2024میں 47 کروڑ ڈالرسے زائد مالیت کی غذائی اشیا ایکسپورٹ کی گئی ہیں جن کی مقامی کرنسی میں مالیت132 ارب 44 کروڑ روپے بنتی ہے۔
رپورٹ کے مطابق جولائی میں باسمتی سمیت چاول کی ایکسپورٹ میں 135 فیصد سے زائد اضافہ ہوا جس کا حجم20 کروڑ57 لاکھ ڈالر رہا، چینی کی برآمد میں 590 فیصد اضافہ ہواجس کاحجم 2 کروڑ 39 لاکھ ڈالر رہا، اسی طرح 2 کروڑ 88 لاکھ ڈالر کی 100فیصد سبزیاں ایکسپورٹ کی گئیں۔
رپورٹ کے مطابق پھلوں کی ایکسپورٹ میں 13 فیصد اضافہ ہوا جن کا حجم 4 کروڑ ڈالر سے زائد رہا،آئل سیڈز اورمیوہ جات کی برآمدات میں بھی 94 فیصد اضافہ ریکارڈ کیا گیا، گوشت کی برآمدات میں تقریبا 6 فیصد اضافہ ہواجس کا حجم 3 کروڑ 68 لاکھ ڈالر رہاجبکہ تمباکو،مچھلی اور مصالحوں کی برآمدات میں کمی ریکارڈ کی گئی۔
