اسلام آباد: موڈیزنے کہا ہے کہ آئی ایم ایف پروگرام سے پاکستان کیلئے عالمی فنڈنگ بہترہوگی،مہنگائی سے سماجی تناؤ بڑھنے کا خدشہ ہے، مشکل معاشی اصلاحات کے مسلسل نفاذ کامضبوط انتخابی مینڈیٹ نہ ہونا خطرات پیدا کرسکتا ہے۔
تفصیلات کے مطابق عالمی ریٹنگ ایجنسی موڈیز نے اپنی ایک رپورٹ میں کہا ہے کہ آئی ایم ایف کے نئے پروگرام سے پاکستان کیلئے فنڈنگ کے امکانات میں بہتری آئے گی، نیا پروگرام فنانسنگ کے معتبر ذرائع فراہم کرے گا،عالمی ایجنسیز اور دیگر ممالک پاکستان کو فنڈ دیں گے۔
رپورٹ کے مطابق پاکستان میں مہنگائی کی وجہ سے سماجی تناؤ بڑھنے کا خدشہ ہے۔زیادہ ٹیکسز، توانائی نرخوں میں مستقبل کی ایڈجسٹمنٹ اصلاحات پردباؤڈال سکتی ہے جبکہ مشکل اصلاحات کو مسلسل نافذ کرنے کا مضبوظ انتخابی مینڈیٹ نہ ہونا خطرات پیدا کرسکتا ہے۔
رپورٹ کے مطابق پاکستان کے پاس موجود 9.4ارب ڈالر کے زرمبادلہ کے ذخائراس کی ضروریات سے کافی کم ہیں، پاکستان کی بیرونی پوزیشن اب بھی نازک ہے، بلند بیرونی مالیاتی ضروریات کے ساتھ اگلے 3سے 5سال پالیسیوں میں مشکلات درپیش ہوں گی۔
موڈیز کے مطابق رواں مالی سال پاکستان کی بیرونی فنانسنگ کی ضروریات تقریبا21ارب ڈالرہیں جبکہ مالی سال2026-27ء کیلئے تقریبا 23ارب ڈالرکی مالی ضروریات درپیش ہیں۔موڈیز کے مطابق کمزور گورننس اور سماجی تناؤ حکومتی اصلاحات کوآگے بڑھانے کی صلاحیت کو متاثرکر سکتا ہے۔
