راولپنڈی: بنوں چھانی پر دہشت گردوں کے حملے میں پاک فوج کے 8جوان شہید جبکہ جوابی کارروائی میں10دہشت گرد ہلاک ہوگئے۔ آئی ایس پی آر کے مطابق 15جولائی کی صبح 10دہشت گردوں کے گروپ نے بنوں چھاؤنی پر حملہ کیا تو سیکیورٹی فورسز نے ان کی چھاؤنی میں داخل ہونے کی کوشش ناکام بنا دی۔آئی ایس پی آر کے مطابق دہشت گردوں نے بارود سے بھری گاڑی چھانی کی دیوار سے ٹکرا ئی جس کے نتیجے میں خودکش دھماکے سے 8بہادر جوان شہید ہوئے جن میں نائب صوبیدار محمد شہزاد، حوالدار ظل حسین، سپاہی ارسلان اسلم، ایف سی کے لانس نائیک سبز علی، سپاہی امتیاز خان، حوالدار شہزاد احمد، سپاہی اشفاق حسین خان، سپاہی سبحان مجید شامل ہیں۔
بیان کے مطابق خودکش دھماکے کے نتیجے میں دیوار کا کچھ حصہ گر گیا اور ملحقہ انفرااسٹرکچر کو بھی نقصان پہنچا۔آئی ایس پی آر کے مطابق کلیئرنس آپریشن میں سیکیورٹی فورسز نے دہشت گردوں کا مقابلہ کیا اور تمام 10دہشت گرد مارے گئے۔آئی ایس پی آر کے مطابق دہشت گردی کی یہ کارروائی حافظ گل بہادر گروپ نے کی ہے جو کہ افغانستان سے کام کرتا ہے،یہ گروپ ماضی میں بھی پاکستان میں دہشتگردی کی کارروائیوں کیلئے افغان سرزمین استعمال کرتا رہا ہے۔
آئی ایس پی آر کے مطابق پاکستان نے عبوری افغان حکومت کے ساتھ مسلسل اپنے تحفظات کا اظہار کیا ہے، افغان کی عبوری حکومت ایسے عناصر کے خلاف موثر کارروائی کرے۔ترجمان پاک فوج کے مطابق افغانستان سے آنیوالے ان خطرات کیخلاف مناسب سمجھے جانے والے تمام ضروری اقدامات کریں گے، جبکہ مسلح افواج دہشت گردی کی اس لعنت کے خلاف مادر وطن اور اس کی عوام کا دفاع کرتی رہیں گی۔
