اسمگل شدہ 25 نایاب نوادرات امریکہ سے مصر واپس پہنچا دیے گئے

مصری وزارت خارجہ کے اعلان کے مطابق قدیم مصری تہذیب کے مختلف ادوار سے تعلق رکھنے والی 25 نایاب نواردات امریکہ سے مصر واپس لائی گئی ہیں۔

مصری قونسل خانہ نیویارک نے ان نواردات کی واپسی کی نگرانی کی ہے۔وزارت نے انہیں حالیہ برسوں میں بازیاب کی جانے والی سب سے بڑی اسمگل شدہ نوادرات کی کھیپ قرار دیا ہے۔

اس مجموعے میں پتھر اور لکڑی کے تابوتوں کے ڈھکن، مٹی اور سونے سے مزین لکڑی کے تدفینی نقاب، ایک بڑا عقیق پتھر کا گلدان اور ایک خاتون کی تصویر شامل ہے جو یونانی-رومی دور (تقریباً 332 قبل مسیح تا 640 عیسوی) سے تعلق رکھتی ہے۔

بازیاب شدہ اشیاء میں مختلف دھاتوں سے بنے  زیورات کی ایک وسیع اقسام، بطلیموس اول کے دور کا ایک نایاب سونے کا سکّہ، اور کانسی و پتھر سے بنے چھوٹے مجسمے بھی شامل ہیں جو قدیم مصری عقائد اور فنکارانہ روایات کی نمائندگی کرتے ہیں۔

یہ بازیابی نیو یارک میں قائم مصری قونصل خانے، نیو یارک شہر کے متعلقہ ڈسٹرکٹ اٹارنی کے دفتر، اور امریکی سیکیورٹی ایجنسیوں کے باہمی تعاون سے ممکن ہوئی ہے۔ اس کارروائی میں ان نجی جمع کنندگان کے ساتھ طویل مذاکرات بھی شامل تھے جن کے پاس یہ نوادرات موجود تھیں۔

اس کارروائی میں مصر کی متعلقہ حکام، بشمول وزارتِ سیاحت و نوادرات، وزارتِ خارجہ کا ثقافتی شعبہ، اور محکمہ استغاثہ نے بھی بھرپور تعاون فراہم کیا ہے۔

مصر نے حالیہ برسوں میں چوری شدہ نوادرات کی بازیابی کے لیے عالمی سطح پر اپنی مہم تیز کر دی ہے تاکہ اپنے قدیم ورثے کا تحفظ اور واپسی یقینی بنائی جا سکے۔

قاہرہ، مصر سے نمائندہ شِنہوا نیوز ایجنسی کی رپورٹ