اسلام آباد ہائیکورٹ نے جماعت اسلامی کی اسلام آباد لوکل گورنمنٹ ترمیمی آرڈی نینس 2026ء کیخلاف درخواست پر وفاق، الیکشن کمیشن کو نوٹس جاری کرتے ہوئے جواب طلب کرلیا۔
جمعہ کو اسلام آباد ہائیکورٹ میں جسٹس محمد اعظم خان نے درخواست پر سماعت کی۔
جماعت اسلامی اسلام آباد کے صدر نصر اللہ رندھاوا وکلا کے ہمراہ عدالت پیش ہوئے۔
وکیل درخواست گزار کے مطابق الیکشن کمیشن نے اسلام آباد میں بلدیاتی انتخابات کا شیڈول جاری کیا جس میں15فروری 2026ء کو بلدیاتی انتخابات کی تاریخ مقرر کی گئی، صدر مملکت نے 10فروری 2026ء کو لوکل گورنمنٹ ترمیمی آرڈی نینس جاری کر دیا۔
وکیل درخواست گزار کے مطابق قومی اسمبلی اجلاس سے محض تین روز قبل آرڈی نینس کا اجرا بدنیتی کا اظہار ہے، آرڈی نینس جاری کرنے کا مقصد بلدیاتی انتخابات کا التوا ہے، انتخابی شیڈول جاری ہونے کے بعد آرڈی نینس کا جواز نہیں بنتا۔
جسٹس محمد اعظم خان نے کہا کہ اس پر نوٹس جاری کرتے ہیں، وکیل نے کہا کہ پہلے بھی عدالت نے بلدیاتی انتخابات کا حکم دیا لیکن انتخابات نہیں کرائے گئے، عدالتی حکم کی خلاف ورزی پر توہین عدالت دائر کی تاہم کچھ نہیں ہوا۔
عدالت نے قرار دیا کہ فریقین کو سنے بغیر کوئی حکم نہیں دے سکتے۔
بعدازاں عدالت نے وفاقی حکومت اور الیکشن کمیشن کو نوٹس جاری کرتے ہوئے سماعت27جنوری تک ملتوی کر دی۔
