قومی ٹیسٹ ٹیم کے کپتان شان مسعود نے کہاہے کہ شاہین آفریدی اور حسن علی ریورس سوئنگ کے لیے بہترین آپشنز ہیں، ہمیں ورلڈ ٹیسٹ چیمپئن شپ میں مختلف کنڈیشنز میں کھیلنا ہے، دوسرے ٹیسٹ کے لیے راولپنڈی کی پچ دیکھ کر فیصلہ کیا جائے گا لاہور ٹیسٹ میں جنوبی افریقا کے خلاف 93 رنز سے فتح کے بعد انہوں نے کہا کہ ورلڈ ٹیسٹ چیمپئن شپ کا فتح کے ساتھ آغاز ہمارے لیے اچھا شگون ہے، ہماری کارکردگی اچھی رہی، کوشش ہے کہ کارکردگی میں تسلسل لائیں، ہم نے پچھلے سرکل میں غلطیاں کیں جس وجہ سے آگے نہ جاسکے۔
انہوں نے کہا کہ شاہین کو نیا گیند نہ کروانا مشکل فیصلہ تھا لیکن بعض اوقات ایسے فیصلے کرنا پڑتے ہیں۔ شاہین ورلڈ کلاس بولر ہیں انہوں نے خود کہا تھا کہ میچ کو بدل دیں گے۔ ان کا کہنا تھا کہ یہ ایسی پچ تھی کہ جس پر نئے بلے باز کے لیے سیٹ ہونا مشکل تھا۔
دونوں اننگز میں ہماری آخری وکٹیں جلدی گریں جس پر قابو پانے کے لیے کوشش کررہے ہیں۔ قومی ٹیسٹ ٹیم کے کپتان نے کہا کہ امام الحق نے اچھا کم بیک کیا ہے اور بڑے اعتماد کے ساتھ بیٹنگ کی، بابر اعظم نے بھی دونوں اننگز میں اچھی بیٹنگ کی۔
عبداللہ شفیق نے دوسری اننگ میں اچھی بیٹنگ کی۔
