اسلام آباد: وزیر دفاع خواجہ آصف نے کہا ہے کہ پاکستان بلیک میلنگ پر یقین نہیں رکھتا ، ایٹمی صلاحتیں اپنے دفاع کیلئے ہیں، اچھے ہمسایوں کی طرح رہنے سے برصغیر میں امن ممکن ،عوام معاشی ترقی کرسکتے ہیں، مودی کے چہرے پر دہشت گردی کا دھبہ لگ چکا، ناکامی بھارتی اپوزیشن کیلئے موقع ہے۔
نجی ٹی وی سے گفتگو میں خواجہ آصف نے کہا کہ پاکستان نے اپنے دفاع میں بھارت سے جنگ لڑی اور جیتی، نریندر مودی کیلئے دوسری جنگ بھارت کے اندر نظر آرہی ہے۔ انہوں نے کہا کہ بھارت کے اندر سے نریندر مودی کیخلاف آوازیں اٹھ رہی ہیں، بھارتی شہری خود کہہ رہے ہیں کہ نریندر مودی کا رویہ ایسا تھا کہ جنگ تک نوبت آگئی۔
انہوں نے کہا کہ پاکستان سے جنگ ایک ڈرانائو خواب بن چکاہے، مودی کو اب خواب میں بھی پاکستان اور پاکستانی افواج نظر آتی ہیں۔ انہوں نے کہا کہ مودی پر کانگریس سمیت چھوٹی ریاستوں میں بھی شہری اب تنقید کر رہے ہیں، بھارتی وزیراعظم ایسے بیانات دے کر اپنے گھر میں اٹھنے والے طوفان کو روکنے کی کوشش ،ووٹرز کو مطمئن کر رہے ہیں۔
انہوں نے کہا کہ پاکستان کی ایٹمی صلاحیتیں اپنے دفاع میں ہیں کسی کو اس سے خطرہ نہیں ہوسکتا، پاکستان نیوکلیئر بلیک میلنگ کر رہا ہے نہ اس پر یقین رکھتا ہے۔
انہوں نے کہا کہ آج سے سال یا ڈیڑھ سال قبل بھارت کا سیاسی و معاشی طور پر کچھ مقام تھا مگر مودی کے ہاتھوں بھارت اپنا مقام کھو بیٹھا ہے، ان کی ناکامی اپوزیشن کیلئے ایک موقع ہے۔ انہوںنے کہا کہ بھارت نے جس طرح دہشتگردی کی پشت پناہی کی اس سے اسے بین الاقوامی سطح پر بھی ناکامی ہوئی۔
انہوں نے کہا کہ مودی کے چہرے پر دہشت گردی کا دھبہ لگ چکا ہے، پاکستان میں بی ایل اے اور طالبان بھارت کی پراکسیز ہیں، ہمارے پاس بھارتی دہشتگردی کے ثبوت ہیں جو ہم نے عالمی فورم پر بھی جمع کرائے ہیں۔ ایک سوال پر انہوں نے کہا کہ اگر اچھے ہمسایوں کی طرح رہا جائے تو برصغیر میں امن ممکن ،عوام معاشی ترقی کرسکتے ہیں۔
