اسلام آباد: پاکستان اور امریکہ نے انسداد دہشت گردی و منشیات، بارڈر سیکیورٹی سمیت مختلف شعبوں میں تعاون بڑھانے پر اتفاق کیا ہے۔
جاری بیان کے مطابق وزیر داخلہ محسن نقوی سے امریکی کوآرڈنیٹر برائے انسداد دہشتگردی گریگوری لوگرفو نے ملاقات کی، اس موقع پر وزیر مملکت داخلہ طلال چوہدری، قائم مقام امریکی سفیر نیٹلی بیکر اور وفاقی سیکرٹری داخلہ بھی موجود تھے۔
ملاقات میں پاک امریکہ تعلقات، انسداد دہشتگردی، بارڈر سکیورٹی، انسداد منشیات سمیت مختلف شعبوں میں تعاون بڑھانے پر اتفاق کیا گیا۔
وزیر داخلہ نے کہا کہ صدر ڈونلڈ ٹرمپ کی حکومت آنے کے بعد پاک امریکہ تعلقات میں غیر معمولی بہتری آئی ہے، امریکی صدر کی عالمی امن کیلئے مخلصانہ کاوشیں قابل تحسین ہیں۔ انہوں نے کہا کہ پاک امریکا تعلقات میں شفافیت، باہمی اعتماد اور تعاون کا عنصر نمایاں ہے، یہ بہترین موقع ہے کہ باہمی تعلقات کو ہر شعبے میں فروغ دیا جائے۔
انہوںنے کہا کہ امریکہ کی جانب سے کالعدم بی ایل اے اور کالعدم مجید بریگیڈ کو عالمی دہشت گرد تنظیمیں قرار دینا احسن اقدام ہے، انسداد دہشت گردی ڈائیلاگ سے مشترکہ لائحہ عمل بنانے میں مدد ملے گی، دہشت گردی کے خاتمے کیلئے تعاون کے مثبت نتائج سامنے آئیں گے۔
اس موقع پر امریکی کوآرڈنیٹر نے کہا کہ پاکستان جیو اسٹریٹجک اعتبار سے انتہائی اہم ملک ہے۔ انہوں نے پاکستان کے 78 ویں یوم آزادی پر وزیر داخلہ اور پاکستانی قوم کو مبارکباد دی اور دہشت گرد حملوں میں جانی نقصان پر افسوس کااظہار کیا۔
