راولپنڈی: پاک فوج نے ملٹری ڈسپلن کی خلاف ورزی پر مزید 3ریٹائرڈ فوجی افسران کو گرفتار کرلیا۔ آئی ایس پی آر کی جانب سے جاری بیان میں بتایا ہے کہ سابق ڈی جی آئی ایس آئی لیفٹیننٹ جنرل (ر)فیض حمید کے فیلڈ جنرل کورٹ مارشل کی کارروائی جاری ہے،اس سلسلے میں مزید 3 ریٹائرڈ فوجی افسران کو ملٹری ڈسپلن کی خلاف ورزی پر فوجی تحویل میں لے لیا گیا ہے۔
آئی ایس پی آر کے مطابق گرفتار افسران میں دو سابق اعلیٰ افسران بریگیڈئیر (ر) غفار اور بریگیڈئیر (ر) نعیم اور ایک سابق کرنل شامل ہیں،تینوں افسران سیاسی جماعت اور لیفٹیننٹ جنرل (ر)فیض حمید کے درمیان پیغام رسانی کا کام کرتے تھے۔
آئی ایس پی آر کے مطابق دونوں ریٹائرڈ بریگیڈیئرز کا تعلق چکوال سے ہے اور یہ جنرل فیض کے خاص اور منظور نظر افسران تھے جو ریٹائرمنٹ کے بعد سیاسی پیغام رسانی اور سہولت کاری میں بھی ملوث تھے۔
آئی ایس پی آر کے مطابق ان ریٹائرڈ افسران اور ان کے ساتھیوں نے سیاسی مفادات رکھنے والے افراد کے ساتھ ملی بھگت کرکے عدم استحکام پیدا کرنے کی کوششیں کیں، ان کیخلاف تفتیش جاری ہے۔
