اسلام آباد: اسلام آباد ہائیکورٹ نے پی ٹی آئی سوشل میڈیا انچارج اظہر مشوانی کے لاپتہ بھائیوں کے بازیابی کیس میں سیکرٹری دفاع کو 20اگست کودوبارہ طلب کرلیا۔ تفصیلات کے مطابق اسلام آباد ہائیکورٹ میں جسٹس میاں گل حسن اورنگزیب نے پی ٹی آئی کے سوشل میڈیا انچارج اشہر مشوانی کے لاپتہ دو بھائیوں بارے والد کی دائر درخواست پر سماعت کی۔
ایڈیشنل اٹارنی جنرل منور اقبال دْوگل، سیکرٹری داخلہ، ڈی جی ایف آئی اے اور ڈی آئی جی آپریشنز پولیس عدالت کے روبرو پیش ہوئے۔سیکرٹری دفاع بیرون ملک ہونے کے باعث عدالت میں پیش نہ ہوسکے، عدالت نے سیکرٹری داخلہ سے استفسار کیا کہ آپ کیا کہیں گے؟ صرف رپورٹ پیش کریں گے؟ کیا سیکرٹری دفاع بھی عدالت میں موجود ہیں؟۔
ایڈیشنل اٹارنی جنرل نے بتایا سیکرٹری دفاع نہیں، جوائنٹ سیکرٹری ڈیفنس عدالت آئے ہیں، سیکرٹری دفاع 11 اگست سے ملک سے باہر ہیں، جوائنٹ سیکرٹری موجود ہیں، اس کیس میں دائرہ اختیار کا معاملہ بھی ہے۔عدالت نے کہا آپ فیڈریشن ہیں، آپ کے پاس اختیار ہے، آپ کے پاس سیکرٹری دفاع، سیکرٹری داخلہ ہیں، یہ معاملہ انا نہ بنائیں۔
عدالت نے سیکرٹری دفاع کو 20 اگست کو دوبارہ طلب کرتے ہوئے ریمارکس دیئے مجھے امید ہے یہ کیس آئندہ منگل تک ختم ہو جائے گا۔عدالت نے اٹارنی جنرل بارے دریافت کرتے ہوئے ریمارکس دیئے اٹارنی جنرل کو کہیں اس باراپنے ویک اینڈ کی قربانی دیں، میں اس پر تفصیلی آرڈر جاری کروں گا۔ بعد ازاں کیس کی سماعت 20 اگست تک ملتوی کر دی گئی۔
