لاہور: وزیراعلی پنجاب مریم نواز نے ہنر کو ترقی کی کلید قرار دیتے ہوئے کہا ہے کہ ہنر کی طاقت قوموں کی تقدیر بدل دیتی ہے، پنجاب حکومت نوجوانوں کو با اختیار بنانے کیلئے انقلابی اقدام کر رہی ہے، چاہتی ہوں پنجاب کا نوجوان نوکری کا طلبگار نہیں بلکہ روزگار دینے کے قابل ہو۔
نوجوانوں کی مہارت کے عالمی دن پر جاری بیان میں مریم نواز نے کہا کہ زمانہ بدل چکا ہے آج کی دنیا تعلیم کیساتھ ہنر کی بھی طالب ہے، ہنر وہ طاقت ہے جو قوموں کی تقدیر بدل دیتا ہے۔
انہوں نے کہا کہ مہارت صرف روزگار کا ذریعہ نہیں بلکہ خود اعتمادی اور قومی ترقی کی ضمانت ہے۔ انہوں نے کہا کہ پنجاب حکومت نوجوانوں کو بااختیار بنانے کیلئے انقلابی اقدام کر رہی ہے، پنجاب کے سکولوں میں ایڈ ٹیک، میٹرک کا پراجیکٹ شروع ہو چکا ہے، زراعت، ماحولیات سمیت ہر سرکاری محکمے میں انٹرن شپس کا آغاز کیا ہے، نوجوانوں کو آئی ٹی سکلز فراہم کی جا رہی ہیں جو اس وقت سب سے بڑا ٹول ہیں۔
انہوں نے کہا کہ نواز شریف آئی ٹی سٹی نوجوانوں کی سکلز کو پلیٹ فارم اور تقویت دے گا، پنجاب میں فری لانسرز کیلئے انٹرنیشنل سرٹیفکیشن پروگرام شروع کیا ہے، ٹیوٹا پنجاب کے نوجوانوں کو جدید دور کی ضرورتوں کے مطابق تربیت دے رہا ہے۔
انہوں نے کہا کہ میرا عزم ہے کہ ہر نوجوان کے ہاتھ میں کوئی نہ کوئی ہنر ہو کیونکہ مہارت روزگار کا راستہ ہی نہیں، بلکہ عزت اور ترقی کی ضمانت ہے، چاہتی ہوں پنجاب کا نوجوان نوکری کا طلبگار نہیں بلکہ روزگار دینے کے قابل ہو۔
انہوں نے کہا کہ نوجوانوں کی فری لانسنگ سے لے کر انٹر پرینیور شپ تک ہر میدان میں کامیابی میران مشن ہے۔
