امریکی سپریم کورٹ نے ٹرمپ کو محکمہ تعلیم ختم کرنے کی اجازت دے دی

تقریباً 20 امریکی ریاستوں نے اس اقدام کو عدالت میں چیلنج کیا، اساتذہ کی یونینوں کے ساتھ مل کر ان کا مؤقف تھا کہ ریپبلکن صدر کانگریس کے اختیارات میں مداخلت کر کے اختیارات کی علیحدگی کے اصول کی خلاف ورزی کر رہے ہیں۔

مئی میں، ڈسٹرکٹ جج میونگ جون نے برطرف کیے گئے محکمہ تعلیم کے سینکڑوں ملازمین کو بحال کرنے کا حکم دیا تھا۔

تاہم، سپریم کورٹ نے بغیر کسی وضاحت کے جج کے حکم کو ختم کر دیا، یہ فیصلہ ان دنوں میں سامنے آیا جب عدالت نے ٹرمپ کو دیگر وفاقی اداروں میں بھی بڑے پیمانے پر برطرفیوں کی اجازت دی۔

جسٹس سونیا سوٹومئیر نے جسٹس ایلینا کیگن اور کیتن جی براؤن جیکسن کے ساتھ اختلافی نوٹ میں لکھا کہ محکمہ تعلیم کو ختم کرنے کا اختیار صرف کانگریس کو حاصل ہے۔

اختلافی نوٹ کے مطابق، اکثریتی فیصلہ یا تو اس کے نتائج سے جان بوجھ کر آنکھیں بند کر رہا ہے یا حد سے زیادہ سادہ لوح ہے، دونوں صورتوں میں یہ فیصلہ آئینی اختیارات کی علیحدگی کے لیے سنگین خطرہ ہے۔

روایتی طور پر، امریکا میں وفاقی حکومت کا تعلیم میں کردار محدود رہا ہے، پرائمری اور سیکنڈری اسکولوں کے لیے صرف 13 فیصد فنڈنگ وفاقی حکومت دیتی ہے، باقی فنڈنگ ریاستی اور مقامی حکومتیں فراہم کرتی ہیں۔

تاہم، کم آمدنی والے اسکولوں اور خصوصی ضروریات رکھنے والے طلبہ کے لیے وفاقی فنڈنگ نہایت اہم سمجھی جاتی ہے، اسی طرح طلبہ کے شہری حقوق کے تحفظ میں بھی وفاقی حکومت کا کردار کلیدی رہا ہے۔

جنوری میں وائٹ ہاؤس واپسی کے بعد، ٹرمپ نے تمام وفاقی اداروں کو ہدایت دی کہ وہ بڑے پیمانے پر عملے میں کمی کے منصوبے تیار کریں۔

یہ ہدایت ڈپارٹمنٹ آف گورنمنٹ ایفیشنسی (ڈی او جی ای) کے تحت دی گئی، جو پہلے ایلون مسک کی زیر قیادت تھا اور اس کا مقصد وفاقی حکومت کے حجم کو کم کرنا ہے۔

ٹرمپ نے سرکاری ملازمین کی ایک بڑی تعداد کو برطرف کرنے اور کئی پروگرامز ختم کرنے کے اقدامات شروع کر دیے ہیں، جن میں تنوع کے منصوبے، محکمہ تعلیم، امریکی انسانی امدادی ادارہ یو ایس ایڈ اور دیگر اداروں کا خاتمہ شامل ہے۔