ایرانی صدر مسعود پزشکیان نے اسرائیل کیخلاف جنگ میں پاکستان کی حمایت کا شکریہ ادا کرتے ہوئے کہا ہے کہ اسلامی ممالک کے درمیان اتحاد اور ہم آہنگی ناگزیر ہے، صہیونی حکومت مسلم ممالک کے درمیان تقسیم پیدا کرنے کی کوشش کر رہی ہے،مسلم حکومتیں اسلامی اتحاد کی اہمیت کو سمجھ جائیں تو وہ صہیونی حکومت کیخلاف متحد محاذ بنا سکتی ہیں۔
ذرائع کے مطابق وفاقی وزیر داخلہ محسن نقوی نے ایران کے دارالحکومت تہران میں ایرانی صدر مسعود پزشکیان سے ملاقات کی جس میں باہمی دلچسپی کے امور سمیت پاک ایران تعلقات اور دوطرفہ تعاون پر تبادلہ خیال کیا گیا۔اس موقع پر ایرانی وزیر داخلہ سکندر مومنی، ایرانی صدر کے معاون خصوصی، پاکستان میں ایران کے سفیر اور ایران میں پاکستان کے سفیر بھی موجود تھے۔
وزیر داخلہ نے اسرائیل کے خلاف جنگ میں عظیم فتح پر ایرانی صدر کو مبارک باد دیتے ہوئے کہا کہ ایران کے سپریم لیڈر سمیت پوری قوم نے دشمن کی جارحیت کا ڈٹ کر مقابلہ کیا، خامنہ ای کی دانشمندانہ قیادت اور آپ کی بہترین حکمت عملی نے جنگ میں فیصلہ کن کردار ادا کیا جو امت مسلمہ کیلئے باعث فخر ہے۔محسن نقوی نے کہا کہ پاکستان نے ایران پر حملے کی ہر فورم پر پر زور مذمت کی، پاکستانی پارلیمنٹ نے سب سے پہلے ایران پر جنگ مسلط کرنے کیخلاف مذمتی قرارداد منظور کی اور ایران کے اپنے جائز حق دفاع کی حمایت کی۔انہوں نے وزیراعظم شہباز شریف کی جانب سے ایرانی صدر مسعود پزشکیان کو نیک خواہشات اور احترام کا پیغام پہنچایا۔
اس موقع پر گفتگو کرتے ہوئے ایرانی صدر مسعود پزشکیان نے اسرائیلی مسلط کردہ جنگ کے دوران پاکستان کی مخلصانہ حمایت پر شکریہ ادا کرتے ہوئے کہا کہ پاکستان کیساتھ اپنے تعلقات کو انتہائی اہمیت دیتے ہیں، پاکستان نے جنگ کے دوران جس طرح ساتھ دیا وہ کبھی نہیں بھول سکتے۔ انہوں نے کہا کہ صہیونی حکومت مسلم ممالک کے درمیان تقسیم اور کمزوری پیدا کرنے کی کوشش کر رہی ہے۔
انہوں نے کہا کہ اسلامی ممالک کے درمیان اتحاد اور ہم آہنگی ناگزیر ہے، مسلم حکومتیں اسلامی اتحاد کی اہمیت کو پوری طرح سمجھ جائیں تو وہ صہیونی حکومت کے خلاف ایک متحد محاذ بنا سکتی ہیں۔صدر مسعود پزشکیان نے ایران اور پاکستان کے درمیان موجودہ دو طرفہ تعلقات پر اطمینان کا اظہار کیااور جامع تعاون کو وسیع کرنے کیلئے سفارتی تبادلوں اور تعمیری مکالمے کی اہمیت پر زور دیا۔
