لاہور سمیت پنجاب بھر میں گندم کی قیمت میں 7سو روپے فی من اضافہ ہوگیا ہے جس کے بعد گندم کی نئی قیمت 4400روپے فی من سے بھی تجاوز کرگئی ہے جبکہ راولپنڈی میں گندم فی من 48 سو روپے ہوگئی ہے۔
مارکیٹ ذرائع کے مطابق راولپنڈی میں 15کلو آٹے کے تھیلے کی قیمت 1500روپے سے بڑھ کر 1750ہوگئی ہے جبکہ لاہور میں گندم فی من 4450روپے میں فروخت ہو رہی ہے۔
ذرائع کا کہنا ہے کہ گوجرانوالہ اور گجرات میں گندم کی قیمت فی من 4500روپے جبکہ ملتان میں گندم 4450 روپے فی من فروخت ہو رہی ہے، بہاولپور اور ڈیرہ غازی خان میں گندم کی قیمت فی من 4400روپے ہے۔
ذرائع کے مطابق لاہور کے مختلف علاقوں میں 10کلو اور 20کلو والا آٹے کا تھیلا نایاب ہوگیا ہے۔
اس حوالے سے چیئرمین فلور ملز ایسوسی ایشن عاصم رضا نے کہا ہے کہ گندم کی قلت کے باعث آٹے کی قیمت میں اضافہ ہوا ہے۔
دوسری جانب محکمہ خوراک پنجاب نے کہاہے کہ صوبے میںآٹے کی کوئی قلت نہیں ہے، گندم بازار میں وافر مقدار میں موجود ہے، 10اور 20کلو آٹے کا تھیلا دکانوں پر وافر مقدار میں دستیاب ہے۔
محکمہ خوراک پنجاب کے مطابق 7سو سے زائد ملیں سرکاری گندم والا سستا آٹا فراہم کر رہی ہیں۔
