عدالت نے متنازع ٹوئٹ کیس میں ایمان مزاری اور شوہر ہادی علی چٹھہ کی ضمانت منسوخ کرتے ہوئے گرفتاری کا حکم جاری کردیا۔
جمعرات کو ایڈیشنل ڈسٹرکٹ اینڈ سیشن جج افضل مجوکا نے کیس پر سماعت کی۔
ہادی علی چٹھہ عدالت میں پیش ہوئے اور موقف اپنایا کہ ایمان مزاری گواہ شہروز پر خود جرح کرنا چاہتی ہیں، جج افضل مجوکا نے کہا کہ گواہ شہروز پر جرح مکمل کریں ورنہ جرح کا حق ختم کر دوں گا۔
صدر اسلام آباد ڈسٹرکٹ بار ایسوسی ایشن چوہدری نعیم گجر نے کہا کہ پیر کی تاریخ دیدیں اس کے بعد التوا نہیں مانگا جائے گا، ایمان مزاری کی طبیعت خراب وہ خود جرح کرنا چاہتی ہیں۔
پراسیکوشن نے التوا دیئے جانے کی مخالفت کرتے ہوئے موقف اپنایا کہ عدالت گواہ سے حلف لے اور جرح شروع کرے۔
اس دوران بار صدر نعیم گجر اور پراسیکیوٹر رانا عثمان کے درمیان کمرہ عدالت میں شدید تلخ کلامی ہوئی، ایڈووکیٹ نعیم گجر نے کہا کہ تم حلف لے کر دکھائو، دیکھتا ہوں کیسے لیتے ہو؟، میں بار کا صدر ہوں، حلف لیا تو ٹانگیں توڑ کر بجھوائوں گا، تلخ کلامی بڑھنے پر جج افضل مجوکا اٹھ کر چیمبر میں چلے گئے اور کیس کی سماعت میں وقفہ کردیا گیا۔
وقفے کے بعد ایمان مزاری اور ہادی علی چٹھہ عدالت میں پیش نہ ہوئے، پراسیکیوٹر رانا عثمان نے کہا کہ عدالت میں افسر آف دی کورٹ پر ہاتھ اٹھایا گیا، نعیم گجر بار کا صدر ہے یا غنڈہ ہے۔
عدالت نے ایمان مزاری اور ہادی علی چٹھہ کی ضمانت منسوخ کرتے ہوئے گرفتاری کا حکم دے دیا۔
عدالت نے ملزمان کا جرح کا حق ختم اور 342 کا بیان ریکارڈ کرنے کا حکم دیتے ہوئے سماعت جمعہ تک ملتوی کردی۔
