بنگلہ دیش کرکٹ بورڈ کے ڈائریکٹر نظم الاسلام کے بیان کے بعد بنگلہ دیشی کرکٹرز نے تمام فارمیٹ کے کرکٹ کے بائیکاٹ کی دھمکی دیتے ہوئے نظم الاسلام کے استعفے کا مطالبہ کر دیا ہے۔
کرکٹ ویب سائٹ کے مطابق نظم الاسلام نے بنگلہ دیش کے ورلڈکپ سے بائیکاٹ کی صورت میں کھلاڑیوں کو مالی ازالہ نہ کرنے سمیت سخت الفاظ استعمال کئے تھے، کھلاڑیوں کی جانب سے بائیکاٹ کی دھمکی کے بعد بنگلہ دیش پریمئر لیگ کے میچز بھی متاثر ہونے کا خدشہ ہے۔
دوسری جانب نظم الاسلام کے بیان پر بنگلہ دیش کرکٹرز ویلفیئر ایسوسی ایشن کے صدر محمد متھون نے کہا ہے کہ نظم الاسلام کو بی پی ایل کے میچز سے قبل مستعفی ہو جانا چاہئے بصورت دیگر کرکٹرز نہیں کھیلیں گے، نظم الاسلام کے ریمارکس کھلاڑیوں کے وقار، پروفیشنل ازم اور عزت کیخلاف ہیں۔
علاوہ ازیں بنگلادیش کرکٹ بورڈ نے نظم الاسلام کے بیان سے لاتعلقی کا اعلان کرتے ہوئے کہا ہے کہ بورڈ توہین آمیز یا دل آزاری کا باعث سمجھے جانیوالے بیان پر دکھ کا اظہار کرتا ہے۔
بی سی بی نے اعلامیہ میں کہا ہے کہ بورڈ ترجمان کے علاوہ کسی ڈائریکٹر کے اس طرح کے بیان کی ذمہ داری نہیں لیتے، کرکٹرز کی توہین کرنیوالے افراد کیخلاف بورڈ ڈسپلنری ایکشن لے گا۔
