کوئٹہ پولیس نے گاڑی سے 30 کاٹن ادویات برآمد کر کے ڈی ایچ او واشک کو گرفتار کر لیا۔
پولیس حکام کے مطابق خفیہ اطلاع ملی تھی کہ دوسرے ڈسٹرکٹ سے سرکاری ادویات فروخت کیلئے کوئٹہ لائی جا رہی ہے جس پر ایس ڈی پی او شالکوٹ اطہر رشید، ایس ایچ او نیو سریاب فتح شیر نے دیگر عملے کے ہمراہ مستونگ روڈ میاں غنڈی پولیس چیک پوسٹ پر ایک روز قبل رات 2 بجے گاڑیوں کی چیکنگ شروع کی، اسی دوران ایک گاڑی کو روکا گیا، سوار شخص نے اپنا تعارف ڈاکٹر محمد اکبر ڈی ایچ او واشک کے طور پر کروایا۔
دوران چیکنگ گاڑی سے 30 کاٹن مختلف ادویات کے برآمد ہوئے جس پر ڈاکٹر کو گرفتار کر کے گاڑی قبضے میں لے لی گئی۔
پولیس حکام کے مطابق پکڑی جانے والی ادویات کی مالیت ایک کروڑ سے زائد ہے۔
