اسرائیلی جیل سے رہائی پانے والے قیدیوں نے کہا ہے کہ اسرائیلی جیل کے حالات بہت برے تھے، وہاں ہر چیز بری تھی، کھانے کے لیے کچھ نہیں دیتے تھے۔
غیر ملکی میڈیا کے مطابق اسرائیلی قید سے رہائی پانے والے قیدی یاسر ابو عمارہ نے کہاکہ انہیں کھانے کے لیے وہاں بس مار کھلائی جاتی تھی، انہوں نے گزشتہ 4 روز سے کچھ نہیں کھایا ہے۔
ایک اور رہائی پانے والے عبداللہ ابو رافع نے بتایا کہ انہیں آزادی ملنے کی خوشی بہت زیادہ ہے، بدقسمتی سے ہم کسی جیل خانے میں نہیں بلکہ مذبح خانے میں بند تھے جس کا نام اوفر جیل بتایا جاتا ہے، وہاں قیدیوں کے لیے گدے بھی نہیں تھے۔
اسرائیلی جیل سے چھٹکارا پانے والے سعید شبیر کا کہنا تھا کہ آزادی ملنے کے بعد میں اپنے جذبات کا بتا نہیں سکتا۔
انہوں نے مزید بتایا، میں نے کئی دنوں سے سورج نہیں دیکھا تھا، اب میرے ہاتھوں پر ہتھکڑی بھی نہیں لگی ہوئی ہے، یہ آزاد ہیں، آزادی انمول ہے۔
