وزیراعظم شہباز شریف نے کہا ہے کہ فلسطینی عوام کی آزادی، وقار اور خوشحالی پاکستان کی خارجہ پالیسی کا اہم ستون ہے، ترجیح غزہ پر مسلط نسل کشی مہم کا فوری خاتمہ تھا، غزہ قتل عام رکوانے پر امریکی صدر ٹرمپ کے شکر گزار ہیں۔
مصر سے پاکستان روانگی سے قبل سوشل میڈیا سائٹ ایکس پر جاری بیان میں وزیراعظم نے لکھا کہ غزہ امن منصوبے بارے اپنے کچھ تاثرات بتانا چاہتا ہوں کہ یہ کیسے ممکن ہوا اور پاکستان کا کیوں اس سے بہت گہرا تعلق رہا ہے؟۔
انہوں نے لکھا کہ پاکستان کی سب سے اہم ترجیح غزہ پر مسلط نسل کشی مہم کو فوری طور پر روکنا تھا دیگر برادر اقوام کیساتھ مل کر اس ترجیح کو تسلسل کے ساتھ بیان کیا اور تقویت دی گئی۔
انہوں نے کہا کہ فلسطینی عوام کی آزادی، وقار اور خوشحالی پاکستان کیلئے بنیادی اہمیت کی حامل ہے،1967سے قبل کی سرحدوں کیساتھ فلسطینی ریاست کا قیام پاکستان کی مشرق وسطی پالیسی کی بنیاد ہے اور رہے گی۔
انہوں نے کہا کہ امریکی صدر ٹرمپ کے شکر گزار ہیں جنہوں نے قتل عام رکوانے کیلئے قدم اٹھانے کا وعدہ کیا اور پورا کیا، ان کی امن کیلئے غیر معمولی خدمات کی تعریف کا اظہار کرتے رہیں گے ۔
