وزیراعلی بلوچستان میر سرفراز بگٹی نے کہا ہے کہ سوشل میڈیا پروپیگنڈا نوجوانوں کو ریاست سے دور کر رہا ہے، واضح دشمن سے لڑنا آسان، اندرونی دشمن سے نمٹنا مشکل ہے، دہشتگرد کو ناراض بلوچ کہنا غلط ہے۔
کوئٹہ میں 17ویں نیشنل ورکشاپ بلوچستان کے شرکاء سے خطاب کرتے ہوئے سرفراز بگٹی نے کہا کہ واضح دشمن کے خلاف کارروائی آسان، اندرونی صفوں میں موجود دشمن سے نمٹنا مشکل ہے، سیکیورٹی فورسز ایسے علاقوں میں کارروائیاں کررہی ہیں جہاں دشمن اور دوست کی پہچان مشکل ہے۔
انہوں نے کہا کہ دہشت گردی سے نمٹنے کیلئے سی ٹی ڈی کی استعداد میں اضافہ کیا جارہا ہے، مقصد کیلئے 10کروڑ روپے مختص کئے گئے ہیں۔ انہوںنے کہا کہ بلوچستان میں شورش نہیں بلکہ علیحدگی کی نام نہاد تحریکیں ہیں، ملک دشمن عناصر کا مقصد پاکستان کو نقصان پہنچانا اور تقسیم کرنا ہے، بلوچستان میں غیر متوازن ترقی کا غلط تاثر جان بوجھ کر پیدا کیا گیا۔
انہوں نے کہا کہ ناراض بلوچ کی اصطلاح دہشت گردی کو جواز فراہم کرنے کیلئے متعارف کروائی گئی جو شخص بندوق کے زور پر تشدد کرے وہ ناراض نہیں بلکہ دہشتگرد ہے۔
انہوں نے کہا کہ بلوچستان میں پہلا فراری کیمپ 21جون 2002ء کو قائم کیا گیا جس سے دہشت گردی کو فروغ ملا۔
انہوں نے کہا کہ سوشل میڈیا کے پروپیگنڈا کے ذریعے نوجوانوں اور ریاست کے درمیان فاصلے بڑھائے گئے، بلوچستان کے حالات کی خرابی کے پیچھے بھارتی ایجنسی را کا واضح کردار ہے، علیحدگی پسند بھارت سے خوش اور پاکستان کو نقصان پہنچانا چاہتے ہیں۔
انہوں نے کہا کہ سیاست سے زیادہ اہم ریاست ہے،دہشت گردی کیخلاف جنگ پوری قوم کی مشترکہ جنگ ہے۔
