مشیر اطلاعات خیبرپختونخوا بیرسٹر ڈاکٹر سیف نے گورنر فیصل کنڈی کی گمشدگی کا اعلان کرتے ہوئے کہا ہے کہ سہیل آفریدی کے انتخاب کی خبر سنتے ہی فیصل کنڈی دباؤ میں آ کر سندھ کے صحراؤں کا رخ کرچکے ہیں، وزیراعلی کے انتخاب کے جمہوری عمل کو متنازع بنانا سیاسی جماعتوں کے منہ پر طمانچہ ہے، تاریخ میں یہ عمل نام نہاد سیاسی اشرافیہ کے سیاہ باب کے طور پر یاد رکھا جائے گا۔
جاری بیان میں بیرسٹر سیف نے کہا کہ گورنر خیبرپختونخوا گزشتہ ایک ہفتے سے لاپتا ہیں، اگر کسی کو کہیں دکھائی دیں تو انہیں گورنر ہاؤس پشاور پہنچا دیا جائے۔
انہوں نے کہا کہ وزیراعلی سہیل آفریدی کے انتخاب کی خبر سنتے ہی گورنر کی ذہنی حالت بگڑ گئی ،سننے میں آیا ہے کہ وہ ذہنی دباؤ کم کرنے کیلئے سندھ کے صحراؤں کا رخ کر چکے ہیں۔
انہوں نے کہا کہ گورنر کو زیادہ دباؤ لینے کی ضرورت نہیں، آئین میں گورنر کے علاوہ کسی اور سے بھی حلف لینے کی گنجائش موجود ہے۔
بیرسٹر سیف نے کہا کہ چیف جسٹس کسی بھی ذمہ دار شخص کو وزیراعلی سے حلف لینے کا کہہ سکتے ہیں، جبکہ صوبائی حکومت کی لیگل ٹیم نے ہائیکورٹ سے رجوع کر لیا ہے ،جلد حلف برداری کا معاملہ حل ہو جائے گا۔
انہوں نے کہا کہ وزیراعلی کے انتخاب کے جمہوری عمل کو متنازع بنانا سیاسی جماعتوں کے منہ پر طمانچہ ہے ،تاریخ میں یہ عمل نام نہاد سیاسی اشرافیہ کے سیاہ باب کے طور پر یاد رکھا جائے گا۔
انہوں نے کہا کہ گورنر کے اس غیر جمہوری رویئے سے شاید قبر میں ذوالفقار علی بھٹو کی روح بھی تڑپ اٹھی ہو۔انہوں نے کہا کہ گورنر تو ویسے بھی کسی کام کے نہیں ان کا واحد کام وزیراعلی سے حلف لینا تھا، وہ بھی ان سے نہیں ہو رہا۔
