ایشیا کپ ٹی ٹوئنٹی کے سب سے بڑے مقابلے میں آج پاکستان اور بھارت کی ٹیمیں دبئی میں ٹکرائیں گی۔ گروپ اے کا یہ میچ پاکستانی وقت کے مطابق شام ساڑھے 7 بجے شروع ہوگا۔
روایتی حریف چھ ماہ کے وقفے کے بعد دوسری بار آمنے سامنے ہوں گے، دونوں ٹیمیں شاندار فارم میں ہیں۔ بھارت نے یو اے ای کو آسانی سے مات دی، جبکہ پاکستان نے افغانستان اور یو اے ای کو ہرا کر تین ملکی سیریز اپنے نام کی۔
پاکستان کو فخر زمان، صائم ایوب، سلمان آغا اور حارث سے بڑی امیدیں ہیں جبکہ بھارت شبمن گل، سوریا کمار یادیو اور بمراہ پر انحصار کر رہا ہے۔
ایشیا کپ میں اب تک دونوں ٹیمیں 19 بار مقابل ہوئیں، جن میں بھارت نے 10 اور پاکستان نے 6 میچ جیتے۔ پاکستان نے بھارت کے خلاف آخری فتح 2022 میں حاصل کی تھی۔
پاکستانی شائقین پرامید ہیں کہ ٹیم اس بار بھی شاندار کارکردگی دکھائے گی۔ صائم ایوب کا کہنا ہے کہ "پاک بھارت میچ لوگوں کے لیے بڑا موقع ہوتا ہے، ہم پرجوش ہیں اور بھرپور تیاری کے ساتھ میدان میں اتریں گے۔”
