اسلام آباد: وفاقی وزیراطلاعات عطاتارڑ نے کہا ہے کہ ریاستی اداروں میں اصلاحات کا عمل جاری ہے، ملکی بقاء، سالمیت، معاشی بحالی کیلئے جو ہوسکا کریں گے، کوئی سیاسی جماعت یا لیڈر ملک سے بڑا نہیں، سیاسی قوتوں کو سوچنا ہوگا سیاسی مفاد کہاں ختم، ملکی مفاد کہاں شروع ہوتا ہے؟۔تفصیلات کے مطابق اسلام آباد میں یوم آزادی بارے منعقدہ تقریب سے خطاب کرتے ہوئے وزیر اطلاعات عطاء تارڑ نے کہا کہ ملکی سالمیت اور بقاء سب سے پہلے باقی سب بعد میں ہے، ملکی بقا،سالمیت اور معاشی بحالی کیلئے جو ہوسکا کریں گے۔
انہوں نے کہا کہ سیاسی قوتوں کوسوچناہوگاسیاسی مفادکہاں ختم ہوتا اور ملکی مفاد کہاں شروع ہوتا ہے؟۔ انہوں نے کہا کہ منزل تک پہنچنے کیلئے سب کو کردار اداکرنا ہوگا۔ انہوں نے کہا کہ پاکستان نے تاقیامت قائم رہنا ہے، ہرگزرتے دن کے ساتھ ثابت ہورہا ہے دوقومی نظریہ درست تھا، دوقومی نظریہ کوعملی جامہ نہ پہنایا جاتا تو جو کشمیر میں ہو رہا ہے وہ یہاں بھی ہوتا۔
انہوں نے کہا کہ یہ ملک ہے تو ہم ہیں، کوئی سیاسی جماعت یا لیڈر اس ملک سے بڑا نہیں ہے۔ انہوں نے کہا کہ ریاستی اداروں میں اصلاحات کاعمل جاری ہے، وزیراعظم قوم سے خطاب میں جامع پلان کااعلان کریں گے جس میں اداروں کی نجکاری،رائٹ اورڈاؤن سائزنگ، دیگر اصلاحات شامل ہیں۔
انہوں نے کہا کہ کسی بھی قدرتی آفت اور مسئلے میں پاکستانی بڑھ چڑھ کر آگے آتے ہیں، پاکستانی قوم دنیا میں سب سے زیادہ خیرات کرتی ہے۔انہوں نے بانی پی ٹی آئی کرین سے گرے تو نوازشریف نے15منٹ میں پارٹی میٹنگ بلا کرانتخابی مہم نہ چلانے کا اعلان کیا اور سیاسی مخالف کو ساتھ مل کر چلنے کی پیش کش کی مگراس شخص نے مسلط ہو کر ملک کا براحال کردیا انہوں نے کہا کہ ارشدندیم کو اسلام آباد میں ریاست کے مہمان کا درجہ دیاگیا ہے، ایک شخص کی محنت نے پوری قوم کومتحد کردیا، ان کی فتح سے یوم آزادی کی خوشیاں دوبالا ہوگئی ہیں۔ انہوں نے خود کہا ہے میں وزیراعظم شہباز شریف کا لگایا ہوا پودا ہوں۔
