اسلام آباد: انٹرنیشنل فیڈریشن آف جرنلسٹس نے متنازع پیکا ایکٹ اور صحافیوں کے مسائل پر چیف جسٹس یحییٰ آفریدی کو خط لکھ دیا۔
آئی ایف جے نے پیکا ایکٹ پر تشویش کا اظہار کرتے ہوئے کہا ہے کہ پاکستان میں صحافیوں کو پیشہ ورانہ فرائض کی انجام دہی میں خطرات، پیکا قانون کے تحت مقدمات، ہراسانی اور دھمکیوں کا سامنا ہے۔
پاکستان نے انٹرنیشنل لیبر آرگنائزیشن اور اقوام متحدہ کے کنونشنز پر دستخط کر رکھے ہیں، پیکا کے تحت آزادی اظہار اور بنیادی حقوق محدود ہو رہے ہیں۔
خط میں کہا گیا کہ صحافیوں پر حملے، ہراسانی اور سوشل میڈیا پر نفرت انگیزی اور تشدد کے کئی کیسز رپورٹ ہوئے، پریس فریڈم رپورٹ کے مطابق 34 خلاف ورزیاں سامنے آئیں جبکہ پاکستان میں ایک سال کے دوران 7صحافی قتل کئے گئے۔
خط میں کہا گیا ہے کہ پاکستان میں صحافیوں کو تنخواہوں کی عدم ادائیگی ،غیرقانونی برطرفیوں اور سیکیورٹی خطرات کا سامنا ہے۔ آئی ایف جے نے کہا کہ سپریم کورٹ کو براہ راست اپیلوں کی اجازت دینا ہائی کورٹس کو بائی پاس کرنے کے مترادف ہے، آئی ایف جے نے پاکستان میں دو مشن بھیجے، جنہوں نے میڈیا ورکرز سے براہ راست ملاقاتیں کیں۔
خط میں کہا گیا ہے کہ آرٹیکل 19کے تحت آزادی صحافت کے تحفظ کیلئے فوری اقدام کئے جائیں۔ خط میں چیف جسٹس سے پیکا قانون کا فوری ازسرنو جائزہ لینے کی اپیل کرتے ہوئے حکومت کو قانون میں ترامیم کی ہدایت دینے کا مطالبہ کیا گیا ہے۔ انٹرنیشنل فیڈریشن آف جرنلسٹس کی جانب سے لکھے گئے خط کی کاپی وزیر اعظم، چیف جسٹس اسلام آباد ہائیکورٹ اور صدر پی ایف یو جے کو بھی ارسال کی گئی ہے۔
