افغانستان کے دارالحکومت کابل میں ایک شخص خشک میوہ جات کی دکان پر کام کررہا ہے۔ (شِنہوا)
کابل(شِنہوا)افغانستان کی وزارت تجارت و صنعت کے ترجمان نے کہا کہ افغانستان نے گزشتہ 10 ماہ کے دوران 35 کروڑامریکی ڈالر سے زائد مالیت کے خشک میوہ جات برآمد کئے۔
مقامی میڈیا ادارے طلوع نیوز نے وزارت کے ترجمان اخوندزادہ عبدالسلام جواد کے حوالے سے بتایا کہ گزشتہ 10 ماہ کے دوران ایک لاکھ 15 ہزار ٹن خشک میوہ جات برآمد کئے گئے جن کی مالیت 35 کروڑ ڈالرسے زائد ہے۔
جواد نے کہا کہ مصنوعات زیادہ تر چین، بھارت، پاکستان، متحدہ عرب امارات، روس، جرمنی، ازبکستان، کینیڈا، برطانیہ، امریکہ اور دیگر ممالک کو برآمد کی گئیں۔
افغانستان کو گزشتہ برس کی اسی مدت کے مقابلے میں خشک میوہ جات کی برآمدات میں کمی کا سامنا کرنا پڑا ہے۔ گزشتہ برس ملک نے 38 کروڑ 80 لاکھ ڈالرمالیت کے خشک میوہ جات برآمد کئے تھے۔
افغانستان کا 2024 کے دوران مجموعی تجارتی حجم 12 ارب امریکی ڈالر سے زائد رہا۔ گزشتہ برس کے مقابلے میں درآمدات میں 38 فیصد اضافہ جبکہ برآمدات میں 4 فیصد کمی ہوئی۔
