رہنماء پی ٹی آئی بیرسٹر علی ظفر نے کہا کہ ہم مذاکرات کی بھیک نہیں مانگ رہے، 2 شرائط پوری کی جائیں، بات چیت کیلئے تیار ہیں۔پارلیمنٹ کے باہر میڈیا سے گفتگو کرتے ہوئے رہنماء پی ٹی آئی بیرسٹر علی ظفر نے کہا کہ دو ،تین دن سے تاثر دیا جا رہا ہے ہم مذاکرات کیلئے مجبور ہیں، بانی پی ٹی آئی نے کہا ہے کہ یہ مذاکرات کا طریقہ نہیں ہوتا، ہم کسی سے بھیک نہیں مانگ رہے ہیں۔
انہوں نے کہا کہ ہم پرالزام لگایا جاتا تھا ہم نے مذاکرات کے دروازے بند کئے ہوئے ہیں، ہم نے دروازے کھولے ہیں مگر 2شرائط رکھی ہیں وہ پوری کریں ہم مذاکرات کریں گے۔انہوں نے کہا کہ ہماری پہلی شرط 24، 25اور 26نومبر احتجاج پر جو کچھ ہوا اس پر کمیشن بنایا جائے، دوسری شرط یہ ہے کہ بغیر کسی وجہ کے جن ورکرز کو جیل میں رکھا ہوا ہے ان کو رہاکیا جائے، اگر یہ شرائط مان لی جائیں تو مذاکرات کے دروازے کھلے ہیں۔
انہوں نے کہا کہ اگر پارلیمانی کمیٹی بات کرنا چاہتی ہے تو بھی ہمیں کوئی اعتراض نہیں ہے، جس کے پاس بات کرنے کا اختیار ہے وہ آئے ہم بات کرنے کو تیار ہیں۔
