اسلام آباد: وفاقی وزیر احسن اقبال نے نئے این ایف سی ایوارڈ میں کشمیر، گلگت بلتستان اور سابق فاٹا کیلئے حصہ رکھنے کا اعلان کرتے ہوئے کہا ہے کہ قومی ترقی کیلئے ٹیکس کلچر کو فروغ دینا ہوگا، ترقیاتی بجٹ کی ایک ایک پائی شفاف، موثر طریقے سے خرچ کر رہے ہیں، آزاد کشمیر کے ترقیاتی منصوبوں کی جلد تکمیل کیلئے فنڈز جاری کرینگے۔
جاری بیان کے مطابق وفاقی وزیر احسن اقبال سے آزاد کشمیر قانون ساز اسمبلی کے وفد نے سپیکر چودھری لطیف اکبر کی سربراہی میں ملاقات کی، وفد میں سابق وزیراعظم فاروق حیدر، وزیر مواصلات ودیگر اعلی حکام شریک تھے۔
ملاقات میں آزاد کشمیر میں جاری ترقیاتی منصوبوں، بنیادی ڈھانچے کی تعمیر و سیاحت کے فروغ بارے امور پر خیال کیا گیا۔ وفاقی وزیر نے کہا کہ آزاد کشمیر کے سیاحتی مقامات پاکستان کی معیشت کی ترقی میں نمایاں کردار ادا کر رہے ہیں، ترقیاتی منصوبوں کی جلد تکمیل کیلئے فنڈز جاری کئے جائیں گے۔
انہوں نے کہا کہ اے جے قانون ساز اسمبلی کمپلیکس کی تعمیر کیلئے وزارت منصوبہ بندی کا مکمل تعاون جاری رہے گا، راتوہا ہریام پل کی تعمیر تیزی سے جاری ہے جو جلد مکمل کی جائیگی۔ انہوں نے کہا کہ نئے این ایف سی ایوارڈ میں کشمیر، گلگت بلتستان اور سابق فاٹا کیلئے حصہ رکھا جائے گا۔
انہوں نے کہا کہ پاکستان کو دفاعی اور سفارتی محاذ پر تاریخی کامیابی ملی ہے، اب ضرورت اس بات کی ہے کہ ہم قومی ترقی کیلئے ٹیکس کلچر کو فروغ دیں کیونکہ پاکستان میں ٹیکس دہندگان کا تناسب تشویش ناک حد تک کم ہے۔انہوں نے کہا کہ ترقیاتی بجٹ کی ایک ایک پائی شفاف اور موثر طریقے سے خرچ کی جا رہی ہے۔
