کراچی: سندھ کے 80 انتہائی مطلوب ملزمان کی فہرست جاری کردی گئی۔ آئی جی سندھ کے احکامات پر انسداد دہشت گردی سیل کی جانب سے جاری فہرست کے مطابق گرے لسٹ کے دوسرے ایڈیشن میں کراچی کے 7 ملزمان کے نام شامل کئے گئے ہیں جن میں ڈسٹرکٹ سٹی کے 2، سائوتھ کے 3 اور کورنگی کے 2 ملزمان شامل ہیں۔
فہرست کے مطابق ڈسٹرکٹ حیدرآباد کے 4، ٹنڈو الہ یار کے 8، سانگھڑ، ٹنڈو محمد خان اور سجاول کے 2،2 جبکہ مٹیاری کے بھی 2 ملزمان کے نام گرے لسٹ میں شامل کئے گئے ہیں۔
دادو اور سکھر کے 9،9 ملزمان ،نوشہرو فیروز کے 5 اور قمبر شہداد گوٹھ کے 9 ملزمان گرے لسٹ کا حصہ ہیں۔ سب سے زیادہ ڈسٹرکٹ لاڑکانہ کے 11مطلوب ملزمان کے نام گرے لسٹ میں شامل ہیں جبکہ جیکب آباد کے 6 اور خیرپور کے 3ملزمان کے نام گرے لسٹ کے دوسرے ایڈیشن میں موجود ہیں۔
پولیس کے مطابق گرے لسٹ میں شامل ملزمان قتل، اقدام قتل، اغوا برائے تاوان، بھتہ خوری، ڈکیتیوں اور پولیس مقابلوں جیسے سنگین جرائم میں ملوث ہیں۔ذرائع کے مطابق صوبے بھر کی چیک پوسٹس، موٹروے پولیس اور ریلوے پولیس کو بھی ان ملزمان کے حوالے سے اطلاع دینے کے احکامات جاری کئے گئے ہیں۔
