ملک کے بیشتر علاقوں میں بارشوں کی شدت بڑھنے کے پیش نظر پی ڈی ایم اے پنجاب نے شہریوں کو غیر ضروری سفر سے گریز، احتیاط برتنے جبکہ متعلقہ اداروں کو الرٹ رہنے کی ہدایت کر دی۔
ترجمان پی ڈی ایم اے پنجاب کے مطابق اس وقت مغربی ہوائیں ملک کے شمالی اور بالائی علاقوں پر اثر انداز ہو رہی ہیں، یہ ہوائیں بالائی پنجاب، خیبرپختونخوا اور شمالی بلوچستان میں نمی اور ٹھنڈک لا رہی ہیں تاہم 17اگست سے ان مغربی ہوائوں کی شدت میں نمایاں اضافہ متوقع ہے جو بارشوں کے سلسلے کو مزید تیز کر دے گا۔
ترجمان کے مطابق 14سے 17اگست کے دوران اسلام آباد، راولپنڈی، لاہور، گوجرانوالہ، سرگودھا، ایبٹ آباد، مانسہرہ، مظفرآباد، میرپور، گلگت، سکردو اور گردونواح میں کہیں کہیں موسلادھار بارش ہو سکتی ہے، اس دوران بعض مقامات پر تیز ہواں اور گرج چمک کے ساتھ بارش کا بھی امکان ہے۔
پی ڈی ایم اے نے خبردار کیا ہے کہ 17اگست سے خلیج بنگال سے مرطوب ہوائوں کا نیا سلسلہ داخل ہوگا جو مغربی ہواں کے ساتھ مل کر ایک طاقتور موسمی نظام بنائے گا، جس کے نتیجے میں 18سے 21اگست کے دوران ملک کے بیشتر حصوں میں شدید بارشیں ہوں گی جن میں کراچی، حیدرآباد، سکھر، کوئٹہ، پشاور، اسلام آباد، لاہور، فیصل آباد اور ملحقہ علاقے شامل ہیں۔
ترجمان کے مطابق اس دوران پہاڑی علاقوں میں لینڈ سلائیڈنگ کا خطرہ بڑھ جائے گا جبکہ شہری اور نشیبی علاقوں میں اربن فلڈنگ اور ندی نالوں میں طغیانی کا خدشہ ہے۔
ترجمان نے عوام سے اپیل کی ہے کہ غیر ضروری سفر سے گریز کریں، کھلے مقامات پر موجود رہنے سے احتیاط کریں، ندی نالوں کے قریب رہائش پذیر افراد نقل مکانی پر غور کریں، موسمی اپ ڈیٹس پر نظر رکھیں اور کسی بھی جانی ومالی نقصان سے بچنے کیلئے حفاظتی اقدامات یقینی بنائیں ۔
