اسلام آباد: پاکستان نے بھارت میں تابکار مواد کی چوری اور غیر قانونی فروخت پر تشویش کا اظہار کرتے ہوئے کہا ہے کہ بھارت میں ایسے حساس مواد کا معمول کے مطابق غلط ہاتھوں میں جانا خطرناک ہے،واقعات کی مکمل تحقیقات اور تکرار روکنے کیلئے مناسب اقدامات کئے جائیں۔تفصیلات کے مطابق پاکستان نے بھارت میں جوہری اور دیگر تابکار مواد کی چوری اور غیر قانونی فروخت کے بار بار ہونیوالے واقعات پر تشویش کا اظہار کیا ہے۔
ترجمان دفتر خارجہ ممتاززہرابلوچ نے ایک بیان میں کہا ہے کہ بھارت میں تازہ ترین واقعے میں غیر قانونی طور پر ایک انتہائی تابکار اور زہریلا مادہ ایک گینگ کے قبضے میں پایا گیاجس کی مالیت 100 ملین امریکی ڈالر ہے، 2021 میں بھی تابکاری کی چوری کے تین واقعات بھی رپورٹ ہوئے تھے۔
ترجمان نے کہا کہ پچھلے مہینے، بھابھا اٹامک ریسرچ سینٹر سے مبینہ طور پر چوری ہونیوالے تابکار ڈیوائسدہرادون سے بھی ملے تھے، یہ بار بار ہونیوالے واقعات نئی دہلی کی طرف سے جوہری و دیگر تابکار مواد کی حفاظت کیلئے اٹھائے گئے اقدامات پر سوالیہ نشان لگاتے ہیں۔
ترجمان دفتر خارجہ نے کہا کہ یہ واقعات ہندوستان کے اندر حساس، دوہرے استعمال کے مواد کی بلیک مارکیٹ کے وجود کی بھی نشاندہی کرتے ہیں، بھارت میں ایسے حساس مواد کا معمول کے مطابق غلط ہاتھوں میں جانا خطرناک ہے۔ترجمان نے کہا کہ پاکستان ان واقعات کی مکمل تحقیقات اور تکرار روکنے کیلئے مناسب اقدامات کیلئے اپنے مطالبے کا اعادہ کرتا ہے۔
