لاہور: وزیراعلی پنجاب مریم نواز نے کہا ہے کہ پوری پاکستانی قوم اپنے کشمیری بھائیوں کی ہر ایک تکلیف کو اپنی تکلیف سمجھتی ہے، ان کے دکھ کو اپنا دکھ سمجھتے ہیں، پاکستان کا بچہ بچہ کشمیر کے حق خودارادیت کی جدوجہد میں ان کے ساتھ کھڑا ہے، 13 جولائی 1931 کے 22 شہدا سمیت ہر کشمیری شہید کو سلام جو ظلم کے خلاف حق کی صدا بنے، بھارتی قابض افواج آج کشمیرمیں ڈوگرہ راج کے مظالم دہرا رہی ہیں۔
اتوار کو یوم شہدا کشمیر پر اپنے پیغام میں وزیراعلی پنجاب مریم نواز نے کہاکہ امریکی صدر ٹرمپ کا مسئلہ کشمیر کے حل پر حالیہ بیان حوصلہ افزا ہے، پاکستان ہر فورم پر کشمیریوں کی سیاسی، سفارتی اور اخلاقی حمایت جاری رکھے گا، کشمیری شہدا کی قربانیوں نے دنیا کو بتا دیا کہ کوئی جبر، کوئی طاقت انکو غلام نہیں رکھ سکتی۔
انہوں نے کہا ڈوگرہ راج ہو یا آج کی ظالم بھارتی فوج، کشمیریوں کے حوصلے کو کبھی شکست نہیں دے سکے۔
انہوں نے کہا کہ کشمیر کے شہدا کی قربانیاں بتاتی ہیں کہ زنجیریں کبھی حوصلے کو قید نہیں کر سکتیں، کشمیر کی مٹی میں حریت، وفا اور قربانی کی خوشبو رچی بسی ہے، یومِ شہدا کشمیر صرف محض ایک دن نہیں بلکہ یہ اقوام متحدہ اور پوری امت مسلمہ کے ضمیر کو جگانے کی صدا ہے۔
