وزیراعظم شہباز شریف نے ٹیکس چوروں کے معاون افسران ،اہلکاروں کیخلاف سخت کارروائی کی ہدایت کرتے ہوئے کہاہے کہ ٹیکس نیٹ میں اضافہ اولین ترجیح ہے، ٹیکس شرح کم کرکے عام آدمی پر بوجھ کم کرنا چاہتے ہیں،سیمنٹ و دیگر شعبوں میں ڈیجیٹل مانیٹرنگ رواں برس جون تک مکمل کی جائے۔منگل کو وزیر اعظم شہباز شریف کی زیر صدارت ایف بی آر کا ٹیکس دائرہ کار بڑھانے ،ٹیکس آمدن میں اضافے پر جائزہ اجلاس ہوا جس میں وفاقی وزراء اعظم نذیر تارڑ، محمد اورنگزیب، احد خان چیمہ، عطا اللہ تارڑ چیئرمین ایف بی آر اور متعلقہ حکام نے شرکت کی۔
اجلاس کو بتایا گیا کہ ملک بھر میں سیمنٹ پلانٹس میں ٹریک اینڈ ٹریس سسٹم کے مکمل نفاذ سے ٹیکس آمدن میں اربوں روپے کا اضافہ ممکن ہوا، چینی کی صنعت میں اس نظام کے نفاذ سے نومبر 2024ء سے اپریل 2025ء تک ٹیکس آمدن میں 35فیصد کا اضافہ ہوا،ایف بی آر اصلاحات کی بدولت ٹیکس آمدنی کا جی ڈی پی کا 10.6فیصد کا ہدف حاصل کر لیا جائے گا۔اجلاس سے خطاب کرتے ہوئے وزیراعظم نے رواں مالی سال میں ایف بی آر کے آمدن اہداف کے حصول کی جانب تیزی سے گامزن ہونے پر حکومتی معاشی ٹیم کی کوششوں کی تعریف کرتے ہوئے کہا کہ ایسے افراد اور شعبے جو ٹیکس دینے کی استعداد رکھتے ہیں اور ٹیکس نہیں دیتے،
انہیں ٹیکس نیٹ میں لایا جائے، ٹیکس چوری کرنے والے افراد و شعبوں کے خلاف بھرپور کاروائی عمل میں لائی جائے۔انہوں نے کہا کہ ٹیکس چوری کی روک تھام کیلئے جدید ٹیکنالوجی کا استعمال کیا جائے، ٹیکس نیٹ میں اضافہ حکومت کی اولین ترجیح ہے، ٹیکس کی شرح کم کرکے عام آدمی پر بوجھ کم کرنا چاہتے ہیں۔ وزیراعظم نے ہدایت کی کہ ٹیکس چوروں کے معاون افسروں اور اہلکاروں کا کڑا احتساب کیا جائے۔
وزیراعظم نے کہا کہ سیمنٹ و دیگر شعبوں میں ڈیجیٹل مانیٹرنگ کو رواں برس جون تک مکمل کیا جائے۔انہوں نے کہا کہ تمباکو کے شعبے میں ٹیکس آمدن کے حصول کیلئے صوبوں کے ساتھ مل کر اقدامات تیز کئے جائیں، ٹیکس سے متعلق زیر التوا مقدمات کی موثر انداز سے پیروی کرکے ملک و قوم کے پیسے کا حصول یقینی بنایا جائے۔وزیراعظم نے کہا کہ اللہ کے فضل سے ملکی معیشت مستحکم ،ترقی کی جانب گامزن ہوچکی ،سب کو اپنی ذمہ داری نبھانا ہوگی۔
