اسلام آباد: رہنماء پی ٹی آئی عاطف خان نے کہا ہے کہ پی ٹی آئی کو ختم کرنے کی سوچ خام خیالی ہے ، اڈیالہ میں ملاقات کرنیوالے غیر ضروری باتیں کرتے ہیں، علی امین کے غائب ہونے سے کارکنوں کی حوصلہ شکنی ہوئی، بتانا چاہئے تھا جلسہ کرنا ہے یا دھرنا دینا ہے، کارکن مایوس ہیں۔نجی ٹی وی سے گفتگو کرتے ہوئے پی ٹی آئی رہنماء عاطف خان نے کہا کہ ڈیل ذات کیلئے اور راستہ ملک کیلئے ہوتا ہے، کسی نہ کسی مرحلے پر پی ٹی آئی کیساتھ بیٹھ کر راستہ نکالنا پڑے گا۔
انہوں نے کہا کہ ہو سکتا ہے کچھ میرے ہی دوست ہوں، جو دونوں کے قریب ہوں، ہوسکتا ہے دونوں میں کچھ چینلز کے ذریعے بات چیت چل رہی ہو۔ انہوں نے کہاکہ اگر کوئی پی ٹی آئی کو ختم کرنے کا سوچ رہا ہے تو یہ ختم نہیں ہو گی، اڈیالہ میں ملاقات کرنے والے وہ باتیں کرتے ہیں جن کی ضرورت ہی نہیں۔
انہوں نے کہاکہ علی امین گنڈاپور کے غائب ہونے سے کارکنوں کی حوصلہ شکنی ہوئی، قیادت کو بتانا چاہئے تھا کہ جلسہ کرنا ہے یا دھرنا دینا ہے، اب کارکن مایوس ہیں ۔ایک سوال پر انہوں نے کہا کہ اس وقت پارٹی میں ہر کوئی دوسرے پر ڈبل گیم کا شک کر رہا ہے۔انہوں نے کہاکہ کوئی شک نہیں یہ حکومت جلدی جائے گی۔
