کراچی: سی ٹی ڈی نے کراچی ایئر پورٹ خود کش دھماکہ پاک چین تعلقات خراب کرنے کی سازش قرار دیتے ہوئے کہا ہے کہ بی ایل اے دہشت گردوں نے دھماکہ دشمن ملک کی خفیہ ایجنسی کی مدد سے کیا۔ سی ٹی ڈی نے کراچی ایئرپورٹ خودکش دھماکے کی ابتدائی رپورٹ عدالت میں پیش کردی جس میں بتایا گیا ہے کہ دھماکہپاکستان اور چین کے تعلقات خراب کرنے کی سازش تھی ، بلوچستان لبریشن آرمی کے دہشت گردوں نے ملک دشمن غیر ملکی خفیہ ایجنسی کی مدد سے دھماکہ کیا ، نامعلوم دہشت گرد نے اپنی گاڑی کو چینی باشندوں کی کانوائے کی گاڑیوں کے قریب لاکر بلاسٹ کیا۔
رپورٹ کے مطابق دھماکہ جناح انٹرنیشنل ٹرمینل کے قریب سی اے اے گارڈ روم کے سامنے ہوا ، پولیس دھماکے کی آواز سن کر موقع پر پہنچی تو دیکھا پولیس ، رینجرز و دیگر افراد زخمی حالت میں موجود تھے، دھماکے میں دو چائنیز باشندے لی جون اور سن ہوازین سمیت 3افراد جاں بحق ہوئے۔
رپورٹ کے مطابق دھماکے میں وقار ، الیاس ، نعیم ، رانو خان ، عظیم ، طارق ، علی، حمزہ ، صبیح سمیت 12سے زائد افراد زخمی ،15گاڑیاں مکمل طور پر تباہ ہوئیں۔
رپورٹ کے مطابق خودکش دھماکے کی ذمہ داری بلوچستان لبریشن آرمی نے قبول کرلی ہے، واقعے کا مقدمہ قتل، اقدام قتل، حملہ، دھماکہ خیز مواد ، دہشت گردی سمیت دیگر دفعات کے تحت تھانہ ایئرپورٹ کے ایس ایچ او کی مدعیت میں سی ٹی ڈی میں درج کیا گیا ہے۔
