اسلام آباد: صدر آصف زرداری نے اقلیتوں کی عبادت گاہوں کو غیر قانونی قبضوں سے واگزار کرانے کیلئے موثر اقدامات کی ہدایت کردی۔ جاری بیان کے مطابق منگل کو صدر مملکت سے وفاقی وزیر مذہبی امور سردار محمد یوسف نے ملاقات کی جس میں اقلیتی حقوق کے تحفظ، مذہبی رواداری کے فروغ اور بین المذاہب ہم آہنگی پر تفصیلی تبادلہ خیال کیا۔
وفاقی وزیر نے صدر کو بتایا کہ اقلیتی فلاحی فنڈ سے 2ہزار 236طلبہ کو 6 کروڑ روپے کے تعلیمی وظائف دیئے گئے ہیں جبکہ ایک ہزار 231ضرورت مند افراد کو مالی امداد فراہم کی گئی ہے، وفاقی وزیر نے بتایا کہ32اقلیتی عبادت گاہوں کی مرمت اور تزئین کیلئے 4کروڑ 50لاکھ روپے کے فنڈز مختص کیے گئے ہیں۔
وفاقی وزیر نے بتایا کہ بیساکھی، گورو نانک دیو جی کی سالگرہ، کٹاس راج اور سادھو بیلا جیسی تقریبات کے لیے سہولیات بلا معاوضہ فراہم کی جا رہی ہیں، نفرت انگیز تقاریر کی روک تھام کیلئے مختلف مذاہب کے علما سے مشاورت کی جاتی ہے۔ وفاقی وزیر نے اقلیتی برادری کے مسائل کے حل اور ان کے حقوق کے فروغ میں دلچسپی اور تعاون پر صدر آصف علی زرداری کا شکریہ ادا کیا۔
اس موقع پر صدر نے وزارتِ مذہبی امور کی اقلیتی برادری کے حقوق کیلئے کاوشوں کو سراہا اور اقلیتوں کی عبادت گاہوں کو غیر قانونی قبضوں سے واگزار کرانے کیلئے مواقدامات کی ہدایت کی ۔
