میڈرڈ: دنیا کے معروف فٹبالر کرسٹیانو رونالڈو نے 9 سال کے طویل سفرِ محبت کے بعداپنی دیرینہ ساتھی جارجینا روڈریگز سے منگنی کرلی۔ 31 سالہ جارجینا روڈریگز نے 40 سالہ کرسٹیانو رونالڈو کے ہمراہ ایک تصویر شیئر کی، جس میں ان کا ہاتھ رونالڈو کے ہاتھ پر رکھا ہوا ہے اور ان کی انگلی میں بڑی سی ہیرے کی انگوٹھی نمایاں ہے۔
جارجینا روڈریگز نے تصویر کے کیپشن میں لکھا کہ ہاں، وہ مانتی ہیں، اس زندگی میں بھی اور اپنی تمام زندگیوں میں بھی۔جارجینا روڈریگز کی منگنی کی انگوٹھی ایک دلکش اوول کٹ ہیرے پر مشتمل ہے جو ایک نفیس بینڈ پر جڑی ہوئی ہے۔
ہسپانوی میڈیا کے مطابق جیولری ماہرین کا اندازہ ہے کہ یہ پتھر 10 سے 15 قیراط وزنی ہے اور اس کی مالیت 10 سے 50 لاکھ ڈالر کے درمیان ہے۔ بعض جیولری ماہرین کا یہ بھی کہنا ہے کہ یہ انگوٹھی 25 سے 30 قیراط وزنی ہے، جب کہ مختلف ذرائع نے اس کی قیمت 20 لاکھ سے 50 لاکھ ڈالر کے درمیان بتائی ہے، جو اس کی شفافیت اور ڈیزائن پر منحصر ہے۔
ریال میڈرڈ اور مانچسٹر یونائیٹڈ کے سابق اسٹار اس وقت سعودی عرب کے کلب النصر کے لیے کھیل رہے ہیں۔ انہوں نے حال ہی میں سعودی کلب کے ساتھ دو سال کی مدت کے لیے 2027 کی گرمیوں تک کا معاہدہ بڑھایا ہے۔
